एसके थकाली
जोमसोम

राष्ट्रिय गौरवको बेनी—जोमसोम—कोरला सडक आयोजना अन्तर्गत उपल्लो मुस्ताङ सडकखण्डको भेना/झैते सडक स्तरोन्नतिको जिम्मा पाएको विरुवा कन्ट्रक्सन प्रालिका निर्देशक पेम्बा लामा शेर्पाविरुद्ध जिल्ला अदालत मुस्ताङमा सवारी मुद्दा दर्ता भएको छ ।

कन्ट्रक्सनले काम गरेको निर्माणधीन सडकखण्डमा प्रयोग भएको ट्रिपर २०७५ साल असार २२ गते अकस्मात ठूलो दुर्घटना हुँदा चालकसहित २० जनाले ज्यान गुमाएका थिए ।

उक्त दुर्घटना हुनुको मुख्य कारण निर्माण कम्पनी दोषी रहेको मृतकका आफन्तले जाहेरीमा उल्लेख गरेका छन् । मृतकका आफन्त वीरबहादुर घर्तीसहित २० जनाको समूहले कन्ट्रक्सनका निर्देशक पेम्बा लामा शेर्पा विरुद्ध जिल्ला अदालतमा मुद्दा दायर गरेको जिल्ला सरकारी वकिल कार्यालयका सूचना अधिकारी भरतकुमार मैनालीले जानकारी दिए ।

स्याङ्वोचे घटनामा ज्यान गुमाएका मृतकका आफन्तहरुले बिरुवा कन्ट्रक्सन प्रा.लि का निर्देशक शेर्पा विरुद्ध सवारी चालक अनुमतिपत्र (लाइसेन्स) नभएको व्यक्तिलाई सवारी चलाउन दिएको आरोप लगाएका छन् । दुर्घटना भएको २ वर्षपछि प्रहरी अनुसन्धान पूरा गरी सरकारी वकिल कार्यालयमार्फत् असार २१ गते मुद्दा दर्ता भएको हो ।

जिल्ला अदालत मुस्ताङले स्याङ्वोचे सवारी दुर्घटनाका आरोपित शेर्पालाई २१ दिन भित्र अदालतमा हाजिर हुन म्याद जारी गरेको छ । लकडाउनका बेला अवस्थामा सर्वोच्च अदालतले यो अवधिलाई शून्य समय मानेकाले लकडाउन फुकुवा भएपछि म्याद जारी भएको मिति गणना हुने अदालतको भनाइ छ ।

सवारी तथा यातायात व्यवस्था ऐन २०४९ को दफा १६१ को उपदफा ५ बमोजिम यदि कसैले आफ्नो सवारी साधन सवारी चालक अनुमतिपत्र नभएको व्यक्तिलाई सवारी चलाउन दिइ दुर्घटना भएको खण्डमा २ वर्षसम्म कैद सजाय हुने व्यवस्था छ ।

ट्रिपर दुर्घटनास्थल जोमसोम÷कोरला सडक खण्डको चौथो प्याकेज हो । जोमसोम÷कोरला सडक २०७४ सालदेखि सडक स्तरोन्नति कार्य सुरु भएको थियो । आयोजना अन्र्तगत बेनी—जोमसोम—कोरला सडकको यो अहिलेसम्मकै सबैभन्दा ठूलो सवारी दुर्घटना हो ।