समाधान संवाददाता, पोखरा

बलात्कार आरोपमा पोखराबाट पक्राउ परेका सशस्त्रका एसएसपी राजेन्द्रकुमार अधिकारीलाई घटना अनुसन्धानका लागि दोस्रो पटक म्याद थप भएको छ ।

जिल्ला अदालत कास्कीबाट ७ दिनको म्याद थप भएको कास्की प्रहरी प्रवक्ता एवं डिएसपी सुवास हमालले जानकारी दिए ।

असार ३१ गते पक्राउ परेका एसएसपी अधिकारीलाई प्रहरीले पहिलोपटक साउन १ गते ७ दिनको म्याद थपेको थियो ।

घटना अनुसन्धानकै क्रममा रहेकाले दोस्रोपटक पनि म्याद थप गरिएको प्रवक्ता हमालले बताए ।

सशस्त्र प्रहरी बल नेपाल हुल तथा दंगा व्यवस्थापन तालिम शिक्षालय लामापाटनका तत्कालीन प्रमुख एसएसपी अधिकारीविरुद्ध बलात्कारको आरोप छ ।

चितवनकी २७ वर्षीया १ युवतीले आफूलाई जबरजस्ती करणी गरेको भन्दै प्रहरी कन्ट्रोल रुममा खबर गरेपछि अधिकारीलाई कास्की प्रहरीले पक्राउ गरी हिरासतमा राखेको छ ।