समाधान संवाददाता
पोखरा

पोखरा विश्वविद्यालयमा तत्काल पदाधिकारी नियुक्तिको माग राख्दै नेपाल विद्यार्थी संघले थालेको रिले अनसन बुधबार आठौं दिन पनि जारी रह्यो । विद्यार्थीहरुको हौसला बढाउन केन्द्र, प्रदेश र स्थानीय तहका नेता कार्यकर्ता दिनहुँजसो विश्वविद्यालय पुग्ने गरेका छन् ।

गण्डकी प्रदेश सभा सदस्य बिन्दुकुमार थापा बुधबार विश्वविद्यालय पुगेर आन्दोलनमा ऐक्यबद्धता जनाएका छन् । हजारौं विद्यार्थीको भविष्यमाथि खेलवाड गर्दै सरकारले अत्यन्तै अशोभनीय काम गरेको उनले बताए । १० महिनासम्म उपकुलपति र पदाधिकारी नियुक्त नहुनु भनेको २ तिहाइको सरकारकै बेइज्जत भएको उनको भनाइ थियो । प्राज्ञिक थलोमा फोहोरी राजनीति खेल खेलेर विश्वविद्यालयलाई अस्तव्यस्त बनाइएको उनले आरोप लगाए ।

प्रदेश सभाको बैठक विशेष समय लिएर उनले पोखरा विश्वविद्यालयको अस्तव्यस्ताको बारेमा सरकारको ध्यानाकर्षण गराइसकेका छन् । प्रदेशको सामाजिक विकास मन्त्री नरदेवी पुनमगरले संघ सरकारको मातहतमा रहेकाले समस्या समाधानका लागि समन्वय गर्ने आश्वास दिएकी थिइन् ।

नेविसंघका नेता भानु ढकालले विद्यार्थीले थालेको आन्दोलनको निकास दिलाएरै छाड्ने बताए । केन्द्रीय महामन्त्री आएर २४ घन्टे अल्टिमेटम दिएर गएको भन्दै उनले अब कुलपति तथा प्रधानमन्त्री केपी ओलीविरुद्ध नै आन्दोलन थालिने बताए । नेविसंघ जहिले पनि विकृति र विसंगति विरुद्ध लड्दै आएको भन्दै अब पनि त्यसका लागि कुनै कसर बाँकी नराख्ने उनको भनाइ थियो । नेपाल भ्रमण वर्ष २०२० कोरोनाले खाए पनि ‘भ्रष्टाचार वर्ष २०२०’ जारी रहेको भन्दै उनले सरकारको कटाक्ष गरे ।

नेविसंघ पोविवि मुल इकाइ अध्यक्ष फिरोज सुवेदीले विद्यार्थीको भविष्यसँग जोडिएको यो विषयलाई राजनीतिक दल र सञ्चारकर्मीले संवेदनशील रुपमा लिइदिन आग्रह गरे । विद्यार्थी नेता राजन भण्डारीले आफूहरु पद जोगाउन र पद पाउन भन्दा पनि नियमित र आंशिक गरी ४० हजार विद्यार्थीको भविष्यका लागि आन्दोलनको मोर्चामा उत्रेको बताए ।

बुधबारकाे अनसनमा सगुन भण्डारी, नूतन भण्डारी र पूजा भण्डारी सहभागी थिए ।

विश्वविद्यालयमा उपकुलपति, रजिस्ट्रार लगायत आवश्यक पदाधिकारी नहुँदा परीक्षाबारे कुनै निर्णय हुन सकेको छैन । देशका अरु विश्वविद्यालयले विद्यार्थीलाई परीक्षाका लागि तयार रहन भने पनि पियुका विद्यार्थी उपकुलपति नियुक्त गरिदिन आग्रह गर्दै हिँड्न बाध्य छन् ।

उपकुलपति नियुक्त नहुँदा विश्वविद्यालयको सभा, शिक्षक नियुक्ति, परीक्षा, स्ववियुको चुनाव, दीक्षान्त समारोह लगायत प्रभावित भएको विश्वविद्यालयका सूचना अधिकारी लोकप्रसाद ढकालले बताए ।

विश्वविद्यालयबाट ८ वटै सेमेस्टर सकेका विद्यार्थीको दीक्षान्त समारोह गत फागुनमा हुनुपर्ने थियो । कुलपति र रजिस्ट्रार नहुँदा समारोह हुन सकेन । ट्रान्सक्रिप्ट र सर्टिफिकेट नपाउँदा पास भएका ७ हजार विद्यार्थी शैक्षिक बेरोजगार बनेका छन् ।

उपकुलपति नियुक्त भएर नआउँदासम्म विश्वविद्यालयको कुनै पनि काम अघि बढाउन सम्भव नरहेको उनी बताउँछन् । ‘एक जना डिन र संयुक्त कलेजका निर्देशकबाहेक विश्वविद्यालयमा अधिकारप्राप्त अधिकारी कोही हुनुहुन्न,’ ढकालले भने, ‘कसरी जाने, के गर्ने अन्योलमात्रै छ । विश्वविद्यालय कुन दिशामा जान्छ थाहा छैन ।’

उपकुलपतिमार्फत नै नियुक्ति सिफारिस हुने रजिस्ट्रार, स्वास्थ्य विज्ञान तथा प्रविधि, मानविकी तथा सामाजिक शास्त्र संकायका डिनको पदसमेत रिक्त रहेको ढकालले जानकारी दिए । व्यवस्थापन संकायमा भने प्राध्यापक हरिबहादुर खड्का डिन छन् । डिनमात्रै होइन स्कुल अफ डेभलपमेन्ट एन्ड सोसल इन्जिनियरिङबाहेक अरु ३ संयुक्त आंगिक कलेजमा निर्देशक पनि छैनन् ।

विश्वविद्यालयका उपकुलपति प्राडा चिरञ्जीवी शर्माको कार्यकाल गत वर्ष असोज पहिलो हप्ता सकियो । त्यसलगत्तै विज्ञान संकायका डिन बुद्धिराज जोशीले ३ महिनलाई उपकुलपतिको जिम्मेवारी पाए ।
जोशीपछि मानविकी संकायका डिन प्राडा इन्द्रप्रसाद तिवारीले उपकुलपतिको जिम्मेवारी पाए । प्राडा तिवारीले वैशाखमा अवकास पाइसकेका छन् ।

शिक्षामन्त्री संयोजक रहेको सर्च कमिटीले उपकुलपतिमा मंसिरमै ३ जनाको नाम सिफारिस गरे पनि प्रधानमन्त्रीले अझै नियुक्त गरेका छैनन् । सूचना अधिकारी ढकालका अनुसार विश्वविद्यालयका ४ आंगिक, ४ संयुक्त आंगिक र देशभर ५८ वटा सम्बन्धन प्राप्त कलेज छन् ।