समाधान संवाददाता
पोखरा

पृथ्वीनारायण क्याम्पसको नेपाली विभागले बुधबार पोखरामा अनुसन्धान अभिमुखीकरण गोष्ठी गरेको छ । कार्यक्रममा क्याम्पस प्रमुख प्राडा सरोज कोइरालाले समयसापेक्ष विषयमा अनुसन्धान गर्नगराउन यो गोष्ठी उपयोगी हुने विश्वास व्यक्त गरे ।

कार्यक्रममा डा.यमनाथ तिमिल्सिनाले अनुसन्धान पद्धति र परम्परा, प्राडा. विश्वकल्याण पराजुलीले शोध शीर्षक छनोट र अध्ययन विधि, प्राडा लेखनाथ भट्टराईले साहित्य सर्वेक्षण र सैद्धान्तिक ढाँचाका बारेमा गोष्ठीपत्र प्रस्तुत गरेका थिए ।

प्राध्यापनसँगै सोध कार्य अत्यन्त आवश्यक भएको भन्दै सहभागीले ४ घन्टासम्म घनिभूत छलफल गरेको विभागीय प्रमुख प्राडा कुसुमाकर न्यौपानेले बताए । उनले आगामी दिनमा योभन्दा विशिष्ट कार्यक्रम गर्दै जाने प्रतिबद्धता समेत जनाए ।

पठनपाठनलाई प्रभावकारी बनाउने अब मासिक रुपमा गोष्ठी गर्ने समेत उनले जानकारी गराए ।

प्राध्यापनमा सहभागीहरुलाई अनुसन्धान विद्वतवृत्ति र विद्यार्थीहरुलाई सोधवृत्ति प्रदान गर्ने तयारीमा आफू जुटेको उनले सुनाए । उनले भने, ‘यसका लागि स्रोतको खोजी भइरहेको छ, बेलायत र अमेरिकामा बस्ने नेपालीले यसमा चासो देखाउनुभएको छ ।’

उपप्राध्यापक यादवराज उपाध्यायले सञ्चालन गरेको कार्यक्रममा स्वागत उपप्राध्यापक गीरबहादुर खड्काले गरेका थिए । क्याम्पसको नेपाली विभागमा अध्यापन गराउनेहरु कार्यक्रममा सहभागी थिए ।