समाधान संवाददाता
पोखरा

पोखरामा २६ औं अन्तर्राष्ट्रिय आदिवासी जनजाति दिवस मनाइने भएको छ । कोरोना संक्रमितको संख्या उकालो लागिरहेका बेला आदिवासी जनजाती सम्बद्ध संस्था आउँदो आइतबार औपचारिक कार्यक्रम गरेरै दिवस मनाउने तयारीमा जुटेका हुन् ।

आदिवासीले विगतमा आफ्नो अधिकारका लागि गरेको आन्दोलन र आउँदो कार्यदिशाबारे छलफल गरिने नेपाल आदिवासी जनजाति महासंघ गण्डकीका अध्यक्ष खेम पुनले बिहीबार आयोजित पत्रकार सम्मेलनमा जानकारी दिए । नदीपुरस्थित छन्त्याल समाज घरमा हुने कार्यक्रममा ३ वक्ताले प्रस्तुति राख्ने छन् ।

सामाजिक दुरी कायम गरेर कार्यक्रम गरिने आयोजकले जनाएको छ । अध्यक्ष पुनका अनुसार नेपालको संविधानमा आदिवासी जनजातिको स्थान, विगतमा भएका आन्दोलन, आगामी कार्यदिशाबारे प्राडा दिलबहादुर क्षेत्री, राजनीतिक विशलेषक युग पाठक र अधिवक्ता सुरेन्द्र थापा मगर वक्ता रहने छन् ।

आदिवासीहरुले पहिचान सहितको संघीयता स्थापना गर्न नसकेको अध्यक्ष पुनले सुनाए । ‘पहिचान सहितको संघीयता आएको छैन । सरकारी मान्यताको भाषा बनाउन प्रयास ग¥र्यौं तर सकेनौं,’ उनले भने । नेपाल आदिवासी जनजाति महासंघ गण्डकी प्रदेश समन्वय परिषद् र जिल्ला समन्वय परिषद्, कास्कीको संयुक्त आयोजनामा कार्यक्रम आयोजना गरिएको हो ।