समाधान संवाददाता
पोखरा

गण्डकी प्रदेशका प्रमुख सचिव विष्णुप्रसाद नेपालसँग मुख्यमन्त्री तथा मन्त्रिपरिषद् कार्यालयका ३ सचिवले कार्यसम्पादन सम्झौता गरेका छन् ।

मुख्यमन्त्री तथा मन्त्रिपरिषद् कार्यालयमा मंगलबार प्रमुख सचिव नेपालसँग शासकीय सुधार तथा समन्वय महाशाखा हेर्ने सचिव रामचन्द्र ढकाल, बैठक तथा प्रशासन महाशाखाका सचिव गणेशप्रसाद पाण्डेय र कानुन तथा संवैधानिक मामला महाशाखाका सचिव दलबहादुर अधिकारीसँग कार्यसम्पादन सम्झौता गरेका हुन् ।

गण्डकी प्रदेश प्रशिक्षणका कार्यकारी निर्देशक ऋषिराम पाण्डेसँग पनि प्रमुख सचिव नेपालले कार्यसम्पादन सम्झौता गरे । त्यसलगत्तै सचिवहरुले शाखा प्रमुख झलकराम सुवेदी, मुक्तिनारायण भण्डारी र रामेश्वर अर्यालसँग सम्झौता गरे ।

कार्यक्रममा मुख्यमन्त्री पृथ्वीसुब्बा गुरुङले नेतृत्व र अधिकार फरक विषय भए पनि कर्मचारीमा यी दुवै कुरा हुने भएकाले त्यही अनुसार कार्यसम्पादन गर्न निर्देशन गरे । सरकारको सफलता र असफलता कर्मचारीकै कार्यसम्पादनमा निर्भर रहने भएकाले त्यही अनुसार जिम्मेवारी वोध गरी काम गर्न उनले आग्रह गरे ।

व्यक्तिको नेतृत्व क्षमताले परिवर्तन सम्भव भएकाले त्यही अनुसार उत्साहपूर्ण रुपमा काम गर्न पनि मुख्यमन्त्री गुरुङले आग्रह गरे । उनले भने, ‘शासकीय सुधारका लागि प्रशासकीय नेतृत्व पनि अग्रसर हुनुपर्छ, नेतृत्व क्षमता भनेको राजनीतिकर्मी मात्र होइन कर्मचारीदेखि किसानसम्मका लागि पनि आवश्यक छ ।’

प्रमुख सचिव नेपालले यो सम्झौता केबल सम्झौताका लागि मात्र नभएर परिणामप्राप्तिका लागि भएको बताए । उनले भने, ‘अब शाखा महाशाखा प्रमुखहरुले वार्षिक रुपमा क्यालेन्डर बनाएर काम गर्नुपर्नेछ । बजेटको लक्ष्यप्राप्तिका लागि पनि हामीहरुले अब दत्तचित्त भएर काम देखाउनुपर्छ ।’ मुख्यमन्त्री तथा मन्त्रिपरिषदको कार्यालयमा सबैजसोको ध्यान केन्द्रित हुने भएकाले नमुनाका रुपमा प्रस्तुत हुन पनि उनले आग्रह गरे ।

मुख्यमन्त्रीले यसअघि साउन २९ गते ६ वटै मन्त्री र प्रमुख सचिवसँग कार्यसम्पादन सम्झौता गरिसकेका छन् । अब मन्त्रालयगत रुपमा मन्त्रीहरुले सचिवसँग र सचिवहरुले मातहतका कर्मचारीका कर्मचारीसँग कार्यसम्झौता सम्पादन गर्नेछन् ।