अभियानको पाँचौं दिन ३३ युनिट रगत संकलन

समाधान संवाददाता २०७७ भदौ १२ गते १८:४१

समाधान संवाददाता
पोखरा

पोखरामा रगतको चरम अभाव भएपछि लायन्स क्लब अफ पोखरा भद्रकालीले थालेको साताव्यापी अभियान अन्तर्गत चौथो दिन शुक्रबार बिहान बाटुलेचौरमा ३३ युनिट रगत संकलन भएको छ ।

बाटुलेचौरको नागरिक वचत तथा ऋण सहकारी संस्था लिमिटेडसँगको सहकार्यमा कालिका मन्दिर परिसरमा कार्यक्रम भएको हो । सहकारीका अध्यक्ष पुष्पराज तिमिल्सिनाले पोखरामा रगतको अभाव भएपछि लायन्स भद्रकालीको आग्रहमा आकस्मिक रुपमा कार्यक्रम राखिएको बताए ।

लायन्स इन्टरनेसल डिस्ट्रिक्ट ३२५ बी १ का ब्लड डोनेसन डिपार्टमेन्ट चिफ बालकृष्ण शर्मा र सहकारी अध्यक्ष तिमिल्सिनाले पहिलो रक्तदाता लक्ष्मी गौतमलाई ब्लड ब्याग हस्तान्तरण गरी कार्यक्रम उद्घाटन गरेका थिए ।

कार्यक्रममा शर्माले भद्रकालीले थालेको अभियान पाँचौ दिनसम्म आइपुग्दा सहभागिता र उत्साह बढ्दै गएको बताए । अहिले अन्य क्लब र संघसंस्थाले पनि आकस्मिक रुपमा रक्तदान कार्यक्रम राखेको उनले जनाए । नियमित रुपमा राखिएका कार्यक्रम कास्की जिल्लामा निषेधाज्ञा जारी भएका कारण रोकिएपछि पोखरामा रगतको अभाव भएको थियो ।

बाटुलेचौरको कार्यक्रममा लक्ष्मी गौतम, जीवनचन्द्र देवकोटा, विमला अधिकारी, ओमबहादुर थापा, मनिराज तिमिल्सिना, राजेश शर्मा, सागर शर्मा, सुशील भट्टराई, सुरेन्द्र शर्मा, भैरव पोखरेल, सावित्री तिमिल्सिनाले रगत दिए । यसैगरी मन्दिप तिमिल्सिना, टंक अधिकारी, नारायणप्रसाद देवकोटा, सुवोध देवकोटा, अशोक गौतम, रितेश तिमिल्सिना, कृष्ण खड्का, विनीता लामिछाने, रक्षिता लामिछाने, विकल तिमिल्सिना र मनिष तिमिल्सिनाले रक्तदान गरे । हरिशचन्द्र खड्का, सीता खड्का, विशाल शर्मा, प्रकाश अधिकारी, सुन्दर बस्नेत, दिनेश श्रेष्ठ, सन्तोष शाही, कृष्णप्रसाद गौतम, अनिल सुनार, अग्निधर तिमिल्सिना र सुरज देवकोटाले रक्तदान गरेको सहकारीका उपाध्यक्ष समेत रहेका क्लब प्रथम उपाध्यक्ष कृष्ण शर्मा तिम्सिनाले जानकारी दिए ।

कार्यक्रममा स्थानीय युवा क्बल, आमा समूह तथा संघसंस्थाको सक्रिय सहभागिता थियो । नेपाल रेडक्रस सोसाइटी क्षेत्रीय रक्तसञ्चार केन्द्र पोखराको प्राविधकि कार्यक्रममा रक्तदान भएको हो ।

भद्रकाली लायन्सले गरेको कार्यक्रमको पहिलो दिन भद्रकाली चोकमा भएको कार्यक्रममा २५ युनिट रगत संकलन भएको थियो । दोस्रो दिन ग्रिन डेभलपमेन्ट सँगको सहकार्यमा सभागृह चोकमा १३ युनिट, तेस्रो दिन समाधान दैनिकको सहकार्यक्रममा नयाँबजारमा २४ युनिट रगत संकलन भएको क्लबका पूर्व अध्यक्ष भरत कोइरालाले बताए । चौथो दिन नदीपुरमा २० युनिट रगत संकलन भएको छ ।

छैटौं दिन शनिबार मानिसको आवतजावत हुने कुनै चोकमा कार्यक्रम गरिने क्लब अध्यक्ष संयुक्त धाख्वाले बताए ।

अझै पनि एबी पोजेटिभ समूहको रगत अभाव भएको क्षेत्रीय रक्तसञ्चार केन्द्रका प्रमुख अर्जुन ज्ञवालीले बताए । रगतको अभाव पूर्ति गर्न आफूहरुले एम्बुलेन्स लिएर घरघरमै रगत संकलन गरिएको उनले बताए ।

रगत अभाव हुँदा अस्पतालमा नियमति शल्यक्रिया र डायलासिस समेत प्रभावित भएको छ । अब भने रक्तदानको लहर चलेको र निषेधाज्ञा पनि भदौ १२ गतेबाट सकिने भएकाले अब भने रगत अभाव नहुने विश्वास केन्द्र प्रमुख ज्ञवालीको छ ।

तपाईको प्रतिक्रिया