साई अर्चना हस्पिटलका सबै कर्मचारीको कोरोना रिपोर्ट नेगेटिभ

समाधान संवाददाता २०७७ भदौ १५ गते १५:३१

समाधान संवाददाता, पोखरा

पोखरा रानीपौवास्थित साई अर्चना हस्पिटलका सबै स्वास्थ्यकर्मी, कर्मचारी र बिरामीको रिपोर्ट नेगेटिभ आएको छ । १० भदौमा उक्त अस्पतालका सुरक्षा गार्डमा कोरोना पुष्टि भएको थियो ।

त्यसपछि अस्पतालका स्वास्थ्यकर्मी, सफाइ कर्मचारी र उपचाररत बिरामी गरी ४८ जनाको स्वाब परीक्षण गरिएकोमा सोमबार रिपोर्ट नेगेटिभ आएको हो ।

अस्पतालका निर्देशक डा. प्रेम पुनले अस्पतालमा सेवा लिन आउन डराउनुपर्ने अवस्था नरहेको बताए । अस्पतालमा स्वास्थ्य सेवा प्रवाह गर्दा पूर्ण सुरक्षा अपनाइएको निर्देशक डा. पुनले जानकारी दिए । अस्पतालका केही स्वास्थ्यकर्मीमाथि घरबेटीले भेदभावपूर्ण व्यवहार गरेकोमा त्यस्तो नर्गन उनले आग्रह गरे ।

‘घरबेटीले पनि भेदभावपूर्ण व्यवहार गरेको पनि देखियो । १०÷१२ जना स्वास्थ्यकर्मीलाई हामीले यहीँ राख्यौं,’ उनले भने, ‘यस्तो संकटमा अग्रमोर्चामा खटिनेलाई हौसला प्रदान गर्नुको सट्टा त्यस्तो व्यवहार गर्नु दुःखद हो ।’

पछिल्लो समय पोखराका विभिन्न अस्पतालका डाक्टर र नर्सहरुमा संक्रमण भेटिन थालेको छ । २ दिन पहिलेमात्रै फूलबारीस्थित मनिपाल शिक्षण अस्पतालका २६ वर्षे डाक्टरमा कोरोना पुष्टि भएको थियो ।

तपाईको प्रतिक्रिया