समाधान संवाददाता
पोखरा

पत्रकार इन्द्रप्रसाद पौडेललाई यस वर्ष सहारा खेलकुद पत्रकारिता पुरस्कार–२०७६ प्रदान गरिने भएको छ । प्रतिभा छनोट समितिले पौडेललाई पुरस्कार दिन गरेको सिफारिसलाई सहारा क्लबका अध्यक्ष केशवबहादुर थापाको अध्यक्षतामा शुक्रबार बसेको बैठकले अनुमोदन गरेको क्लबद्वारा जारी गरेको विज्ञप्तिमा उल्लेख गरिएको छ ।

सहारा क्लब पोखराले खेलकुद बिटलाई प्राथमिकता दिएर समाचार सम्प्रेषण गर्ने पत्रकारलाई योगदानको आधारमा बर्सेनि उक्त पुरस्कारबाट पुरस्कृत गर्दै आएको छ । क्लबको २२ औं वार्षिकोत्सव अवसरमा यही भदौं ३० गते सो पुरस्कार प्रदान गरिने भएको छ ।

पुरस्कार राशी २० हजार ५ सय ५५ र ताम्रपत्र रहेको छ । प्रतिभा छनोटका लागि क्लब सल्लाहकार समेत रहेका अग्रज पत्रकार नारायण कार्कीको संयोजकत्वमा समिति गठन भएको थियो ।

समितिको अन्य सदस्यमा नेपाल पत्रकार महासंघ कास्कीका अध्यक्ष दीपेन्द्र श्रेष्ठ, नेपाल खेलकुद पत्रकार मञ्च गण्डकीका अध्यक्ष एकराज गिरी, एन्फाका पश्चिमाञ्चल क्षेत्रीय अध्यक्ष एवं एन्फा कास्कीका पूर्वअध्यक्ष खेमबहादुर गुरुङ, जिल्ला खेलकुद विकास समितिका कार्यालय प्रमुख प्रकाश बराल, क्लबका पूर्व अध्यक्षद्वय विक्रम थकाली, वीरभद्र आचार्य, क्लबका अध्यक्ष केशवबहादुर थापा र महासचिव रामजीप्रसाद अधिकारी पदेन सदस्य छन् ।

कास्कीको अन्नपूर्ण गाउँपालिका ३ स्थायी घर भई हाल पोखरा ८ मा बस्दै आएका पौडेल २०६२ देखि कान्तिपुर टेलिभिजनमा आवद्ध छन् । केही वर्ष उनले समाधान दैनिक र हटलाइन दैनिकमा फोटो पत्रकार तथा संवाददाताको रुपमा समेत काम गरेका थिए ।

बिएसम्मको अध्ययन गरेका, नेपाल पत्रकार महासंघ गण्डकी प्रदेशका सचिव समेत रहेका पौडेल प्रेस काउन्सिल क्रियाशील पत्रकारिता पुरस्कार २०७२, (विनाशकारी भूकम्प, बाढी पहिरोको जटिलताबीच जीवनको प्रवाह नगरी चुनौती पूर्ण पत्रकारिता गरे स्वरुप), कास्की जिल्ला भलिबल संघ २०७५, फोटोग्राफर संघ पोखरा लगायतबाट सम्मानित भएका छन् ।

२०३४ असोज २६ गते बाबु हरिलाल पौडेल र आमा मुवादेवी पौडेलको कोखबाट जन्मेका पौडेल विभिन्न सहकारी तथा सामाजिक संघ संस्थामा आवद्ध भई छिमेकी मुलुक भारत, चीन, थाइल्यान्ड, कम्बोडिया, फिलिपिन्स, दुवई, मलेसिया, सिंगापुर, इन्डोनेसिया, बगंलादेशमा समेत भ्रमण गरेको अनुभव छ ।

आमा बाबुसहित श्रीमती भारती बराल (पौडेल), छोरी सोनीया र छोरा सुशान्त पौडेलको साथमा रहेका पौडेल विभिन्न समयमा पत्रकारिता, फोटो पत्रकारिता, भिडियोग्राफी र स्वास्थ्य सम्बन्धी तालिम लिएको थप अनुभव समेत छ ।

यसअघि उक्त पुरस्कारबाट पत्रकार कुलचन्द्र न्यौपाने, धन बस्नेत, विनोद लामिछाने, राम गुरुङ, प्रेमनारायण न्यौपाने, दीननाथ बराल, प्रदीप पौडेल, एकराज गिरी, सागरराज तिमिल्सिना, कृष्णमणि बराल, एमबी आस्था, सुरज श्रेष्ठ, विजय नेपाल र सन्देश श्रेष्ठ पुरस्कृत भइसकेका छन् ।