उपचारको क्रममा मृत्यु भएकी गोरखाकी वृद्धामा कोरोना पुष्टि, गण्डकीमा मृतक १९ पुगे

समाधान संवाददाता २०७७ भदौ २१ गते ११:१०

समाधान संवाददाता, पोखरा

गोरखा अस्पतालमा उपचारको क्रममा मृत्यु भएकी एक वृद्धामा कोरोना पुष्टि भएको छ । ब्रेन ह्यामरेज भएर शनिबार अस्पताल भर्ना भएकी गोरखा नगरपालिका ७ की ७५ वर्षीया वृद्धामा आइतबार कोरोना पुष्टि भएको हो ।

गोरखा अस्पतालका निमित्त मेडिकल सुपरिटेन्डेन्ट डा नविन थापाका अनुसार घरमा उपचार गराइरहेकी उनलाई अचेत अवस्थामा अस्पतालमा ल्याइएको थियो । शंका लागेपछि उनको स्वाब लिएर अस्पतालको इमर्जेन्सी सेवा बन्द गरिएको थियो । अहिले अस्पतालका स्वास्थ्यकर्मीको व्यवस्थापन गरेर र डिस्इन्फेक्सन प्रक्रिया सकेर सेवा सुरु गरिएको डा थापाले जानकारी दिए ।

योसहित गण्डकी प्रदेशमा कोरोनाबाट मृत्यु हुनेको संख्या १९ पुगेको छ । कास्कीका ५, गोरखाका ४, तनहुँका ३, स्याङ्जा र नवलपुरका २/२, म्याग्दी, लमजुङ र बागलुङका १/१ संक्रमितको मृत्यु भएको छ ।

गण्डकी प्रदेशमा कोरोना संक्रमितको संख्या २५ सय १६ पुगेको छ । तीमध्ये १७ सय ६६ जना निको भएका छन् ।

तपाईको प्रतिक्रिया