समाधान संवाददाता
तनहुँ, २८ भदौ

जिल्ला प्रहरी कार्यालय तनहुँले विभिन्न मुद्दामा फरार ३५ जनालाई पक्राउ गरेको छ । जिल्ला अदालतबाट सजाय फैसला भए पनि कारवाही नभोगेका ती व्यक्ति आइतबार पक्राउ परेका हुन् ।

बहुविवाह, ठगी, नागरिकता किर्ते लगायत मुद्दामा दोषी ठहर भई फरार भएकालाई पक्राउ गर्न सफल भएको तनहुँका प्रहरी प्रमुख प्रहरी उपरीक्षक (एसपी) अरुण पौडेलले जानकारी दिए ।

अदालतले उनीहरुलाई २ सयदेखि २ लाख रुपैयाँसम्म जरिवाना तोकेको थियो । फरार १ जना भने बहुविवाह मुद्दामा पाँच हजार रुपैयाँ जरिवानासहित १ वर्ष ३ महिना कैद सजाय फैसला भएका छन् ।

उनीहरुलाई अदालत पेश गरिएकामा अधिकांश जरिवाना भुक्तान गरेर गएको र बहु विवाहको सजायमा १ व्यक्ति कारागार चलान भएको एसपी पौडेलले बताए । उनीहरूबाट ४ लाख बढी जरिवाना अदालतले संकलन गरेको छ ।

तनहुँ प्रहरीले केही समययता अदालतको पुरानो फैसला कार्यान्वयनमा जोड दिइरहेको छ। तर फरार भएकालाई एकैपटक ठूलो संख्यामा नियन्त्रणमा लिइएको भने यो पहिलो घटना हो ।

एसपी पौडेलले अपराध गर्नेको मनोबल यस घटनाले गिराउने दाबी गरे । ‘हाम्रो कारवाही शुरु भएपछि कति आफैं अदालत पुगेर सजाय भुक्तान गर्न थालेका छन्,’ उनले भने, ‘जति नै सानो र पुरानो सजाय भए पनि भुक्तान गर्नैपर्छ भन्ने सन्देश दिन सफल भएका छौं।’