रेडियो बाराहीका सबै कर्मचारी क्वारेन्टाइनमा

समाधान संवाददाता २०७७ भदौ ३१ गते १७:३४

समाधान संवाददाता, पोखरा

समाचार शाखामा कार्यरत पत्रकार गोविन्द सुवेदीलाई कोरोना पुष्टि भएपछि रेडियो बाराहीका १५ कर्मचारी क्वारेन्टाइनमा बसेका छन् । टक शोसमेत चलाउने सुवेदीलाई कोरोना देखिएपछि ४ जना रेडियोमै आवसीय रुपमा र अरु होम क्वारेन्टाइनमा बसेको रेडियोका कार्यकारी निर्देशक रमेश पौडेलले जानकारी दिए ।

‘रेडियो बन्द हुनुहुँदैन । २ जना प्राविधिक र २ जना समाचार पढ्ने त्यहीँ आवसीय रुपमा बस्नुभएको छ । अरु घरमै बसेका छौं,’ कार्यकारी निर्देशक पौडेलले भने । पत्रकार सुवेदीमा बुधबार बिहान कोरोना पुष्टि भएको हो । सामान्य ज्वरो आएपछि उनले ३ दिन पहिला स्वाब दिएका थिए ।

उनी अहिले पोखराको गैरापाटनस्थित डेरामै बसेका छन् । उनको स्वास्थ्य अवस्था सामान्य छ । सुवेदी नयाँ पत्रिकाका लागि पोखराबाट काम गर्छन् । आफ्नो सम्पर्कमा रहेकाहरुलाई सुरक्षित बस्नआग्रह गरेका छन् ।

पत्रकार सुवेदीले फेसबुकमा लेखेका छन् : ज्वरो आएपछि स्वाव दिएँ । रिपोर्ट आउँदासम्म धेरै सुधार भइसकेको छ । सम्पूर्ण शुभेच्छुक र शुभचिन्तक ज्युहरुमा ढुक्क रहन आग्रह गर्दछु । कोरोनालाई छिट्टै जित्ने छु । तै पनि जो जो नजिक रहनुभयो सुरक्षित रहनुहोला ।

तपाईको प्रतिक्रिया