जोमसोममा ११८ बेडको होटल क्वारेन्टिन

समाधान संवाददाता २०७७ असोज ८ गते १४:३२

एसके थकाली
जोमसोम

मुस्ताङको घरपझोङ गाउँपालिकाको पहलमा जिल्लाका ४ स्थानीय तहले १ सय १८ बेड क्षमताको होटल क्वारेन्टिन तथा आइसोलेसन कक्ष स्थापना गरेका छन् । गत भदौ २३ गतेको घरपझोङ गाउँ कार्यपालिकाको निर्णय बमोजिम भदौ २५ गते ४ गाउपालिकाहरुको स्थानीय सिसिएमसीको संयुक्त बैठकले उक्त प्रस्ताव गरेसँगै सदरमुकाम जोमसोमको होटल प्राइडलाई क्वारेन्टिन तथा प्रिआइसोलेसन कक्ष स्थापना गर्ने निर्णय गरेको थियो ।

जिल्ला बाहिरबाट मुस्ताङ प्रवेश गर्ने तथा जिल्लामा संक्रमित भएकाकाको कन्ट्र्याक ट्रेसिङमा पर्ने व्यक्तिलाई उचित व्यवस्थापन गर्न लोेमान्थाङ, लोघेकर दामोदरकुण्ड, वारागुङ मुक्तिक्षेत्र र घरपझोङ गाउपालिकाले संयुक्त क्वारेन्टिन तथा प्रि—आइसोलेसन स्थापना गर्न सहमत भएका हुन् ।

यसअघि स्थानीय सिसिएमसीको संयुक्त बैठकले जोमसोमका होटल व्यवसायीहरुलाई क्वारेन्टिन तथा प्रि—आइसोलेसन व्यवस्थापन गर्न लिजमा दिने प्रावधानको सूचना प्रकाशित गरी जानकारी गराएको थियो । जसअनुसार क्वोरन्टिन तथा प्रि—आइसोलेसनका लागि लिजमा दिन होटल प्राइड जोमसोमले मात्र आवेदन हालेको थियो ।

क्वारेन्टिनका लागि होटल सञ्चालक र स्थानीय सिसिएमसीबीच मासिक ३ लाख ६० हजार भाडा तिर्ने सम्झौता भएको घरपझोङका निमित्त प्रशासकीय अधिकृत हिमलाल शर्माले जानकारी दिए । उनका अनुसार सम्झौता गरिएको ४ तले होटलमा ३ बेड क्षमताको ३४ वटा एटेच बाथ र ४ बेड क्षमताको ४ वटा कोठा छन् । क्वारेन्टिन तथा आइसोलेसनमा बस्ने व्यक्तिको सुविधाका लागि इन्टरनेटको सुविधा समेत उपलब्ध छ ।

मुस्ताङका ४ स्थानीयतहका सिसिएमसी बैठकले होटल क्वारेन्टिन तथा प्रि—आइसोलेनमा बस्ने व्यक्तिले कोठा भाडाबाहेक खाना / खाजा खर्च सम्वन्धित व्यक्तिले व्यहोर्नु पर्ने र यदि त्यहाँ बस्ने व्यक्तिको आर्थिक अवस्था कमजोर भएमा ४ वटै पालिकाले बेहोर्ने छन् ।

म्याग्दी हुँदै मुस्ताङ प्रवेश गर्ने सबैभन्दा पायक पर्ने स्थान जोमसोम भएकाले सम्वन्धित पालिकामा आउने व्यक्तिको व्यवस्थापनमा समान खर्च व्यवहोर्न राजी भएका हुन् । मुस्ताङ जिल्ला कोरोनामुक्त जिल्ला भएको, सडक सञ्जाल सहज हुँदै गएको, चाडपर्व नजिकिँदै गरेको, स्याउ तथा आलु खरिद्ने व्यापारी आउने क्रम बढेको र शैक्षिक संस्था खुलेसँगै शिक्षक कार्यक्षेत्र फर्किन थालेकाले आएका व्यक्तिलाई १४ दिन अनिवार्य क्वारेन्टिनमा राख्न होटल क्वारेन्टिनको व्यवस्था गरिएको घरपझोङका स्वास्थ्य संयोजक कर्ण थकालीले जानकारी दिए । उनका अनुसार पालिकाले भदौ अन्तिमदेखि असोज अन्तिमसम्म १ महिनाको लागि होटल लिजमा लिएको हो । तर, क्वारेन्टिनको आवश्यकता र औचित्य देखिएमा उक्त क्वारेन्टिन तथा आइसोलेसनको अवधि थप्न गर्न सकिने जनाइएको छ ।

त्यस्तै, होटल क्वारेन्टिनमा बस्ने व्यक्ति तथा होटल सञ्चालकका कर्मचारीहरुका लागि पालिकाहरुले आवश्यक स्वास्थ्य सुरक्षा सामग्री उपलब्ध गराएको संयोजक थकालीले उल्लेख गरे । त्यस्तै, क्वारेन्टिनमा बस्ने व्यक्तिका लागि होटलका कर्मचारीले आवश्यक सुरक्षा मापदण्ड तथा होसियारी अपनाएर खाजा÷खाना डेलिभरी गर्नुपर्ने सम्झौता प्रावधानमा तोकिएको स्वास्थ्य संयोजक थकालीको भनाई छ ।

मुस्ताङको थासाङ गाउपालिकाले थासाङ—३ मा अवस्थित लेते प्रहरी चौकी नजिकै रहेको प्रयोगविहीन सरकारी कार्यालय भवनमा विशेष कोरोना लक्षित क्वारेन्टिन तथा प्रिआइसोलेसन स्थापना गरेको प्रमुख प्रशाकीय अधिकृत सन्तोष केसीले जानकारी दिए । थासाङले १० बेड क्षमताको विशेष क्वारेन्टिन तथा प्रिआइसोलेसन कक्ष निर्माण गरेको हो ।

तपाईको प्रतिक्रिया