समाधान संवाददाता, पोखरा

पोखरा जेसिजले सडक बालबालिकाहरुलाई शैक्षिक, स्वास्थ्य तथा खेलकुद सामग्री हस्तान्तरण गरेको छ ।

अन्नपूर्ण गाउँपालिका १ लेवाडेस्थित फूलबारी स्रोत केन्द्रमा रहेका १७ जना सडक बालबालिकालाई शैक्षिक सामग्रीका साथै स्वास्थ्य सामग्री समेत हस्तान्तरण गरेको हो ।

पोखरा जेसिजले सप्ताहव्यापी कार्यक्रम अन्तर्गत दोस्रो दिन ती सामग्री प्रदान गरिएको हो ।

सडकमा रहेका बालबालिकाको भविष्य अन्धकारमा नभई उज्यालो हुनुपर्दछ भन्ने सोचका साथ बालबालिकालाई सहयोग गरेको हो ।

पोखरा महानगरपालिकाको सहयोगमा सडक बालबालिकाको उद्धार गरी फूलबारी स्रोत केन्द्रमा राखिएको छ ।

केन्द्रले सडक बालबालिकाको उद्धार गरी स्नातकसम्म अध्ययनको लागि समेत सहयोग गर्दै आइरहेको छ ।

कार्यक्रममा अन्नपूर्ण गाउँपालिकाका अध्यक्ष युवराज कुँवरले मानव भावना लिएर शिक्षाको ज्योति देखाउन सहयोग गरेको भन्दै आभार प्रकट गरे ।

सडकमा रहने बालबालिका मात्र नभई उनीहरुलाई पाउने कतिपय आमा समेत सडकमै रहने गरेको भन्दै कुँवरले त्यस्ता महिलाको समेत उद्धार गरी सीपमूलक तालिम दिएर जीविकोपार्जनको बाटो देखाउन आवश्यक रहेको बताए ।

‘गरिबका मात्र होइन धनीका छोराछोरी समेत विभिध कारणले सडकमा आउने गरेका रहेछन् । हामीले कोसिस गरे सम्भव रहेछ,’ कुँवरले भने ।

३२ रोपनी क्षेत्रफलमा फैलिएको सो क्षेत्रमा बालबालिकालाई राख्ने आवास गृह, तालिम हल समेत रहेको छ ।

गण्डकी प्रदेश सरकार, पोखरा महानगरपालिका तथा अन्नपूर्ण गाउँपालिकाको सहयोगमा सो क्षेत्रमा पुग्ने बाटोसहित किचन तथा आवस समेत निर्माण भएको स्रोतकेन्द्र प्रमुख रामचन्द्र शर्माले बताए ।

कार्यक्रममा सप्ताहव्यापी कार्यक्रम संयोजक मीनराज खड्का, पोखरा जेसिजका अध्यक्ष शिवप्रसाद सापकोटा, शैक्षिक सामग्री हस्तान्तरण संयोजक कपिल पौडेल, सहयोगदाता प्रीति मगर लगायतले आफ्नो भनाइ राखेका थिए । हाल स्रोतकेन्द्रमा १४ बालक, ३ बालिका र एक वयस्क छन् ।