पर्यटनमन्त्रीले गरे सुदूरपश्चिमका ३ विमानस्थल उद्घाटन

समाधान संवाददाता २०७७ असोज १७ गते १६:१६

डोटी, रासस

संस्कृत, पर्यटन तथा नागरिक उड्यनमन्त्री योगेश भट्टराईले सुदूरपश्चिम प्रदेशका ३ जिल्लाका विमानस्थलको उद्घाटन गरेका छन् ।

कालोपत्रसहित अन्य भौतिक संरचना निर्माण सम्पन्न भएका सुदूरपश्चिमका बैतडीको पाटन, बझाङको चैनपुर तथा डोटीको दिपायल विमानस्थलको मन्त्री भट्टराईले एक औपचारिक कार्यक्रमका बीच शनिबार उद्घाटन गरेका हुन् ।

दिपायल विमानस्थलको उद्घाटनका क्रममा मन्त्री भट्टराईले सुदूरपश्चिमका पर्यटकीयस्थल खप्तड, मानसरोवर लगायतका क्षेत्रमा पर्यटक भित्र्याउनका लागि भए पनि ३ जिल्लामा रहेका विमानस्थलमा नियमितरूपमा जहाज सञ्चालन गरिने बताए ।

उनले भने, ‘यहाँका पर्यटकीय क्षेत्रमा स्वदेशी तथा विदेशी पर्यटक भित्र्याउनका लागि भए पनि हामी नियमितरूपमा जहाज चलाउने छौं । स्थानीय नागरिकको पनि सहयोग आवश्यक पर्नेछ ।’

मन्त्री भट्टराईले पहाडी जिल्लामा नियमितरूपमा विमानस्थल सञ्चालनका लागि समिट एयर सहितका केही निजी विमान कम्पनीसँग सम्झौताको तयारी भइरहेको समेत जानकारी दिए । विमानस्थलको टर्मिनल भवन तथा एटीसी भवन नयाँ निर्माणका लागि पनि आवश्यक पहल भइरहेको उनले बताए ।

यात्रु अभावको कारण देखाई लामो समयदेखि बन्द अवस्थामा रहेका विमानस्थलको थप स्तरोन्नतिसमेत गरिने मन्त्री भट्टराईले प्रतिबद्धता जनाए ।

त्यसैगरी ४९० मिटर लम्बाइको रनवे रहेको डोटीको दिपायल विमानस्थलको रनवेलाई १ हजार मिटर बनाउनका लागि अध्ययन गर्न मन्त्रालयले नागरिक उड्डयन प्राधिकरण विभागबाट तत्कालै प्राविधिक टोली पठाइने मन्त्री भट्टराईले बताए ।

उनले भने, ‘दिपायल विमानस्थल कूल १ हजार मिटर रनवे सहितको निर्माण गरिने छ, यसका लागि हामी छिट्टै प्राविधिक टोली पठाउँछौं, केही प्राविधिकहरु आइसक्नुभएको छ ।’

कार्यक्रममा डोटीबाट निर्वाचित संघीय सांसद प्रेमबहादुर आलेमगरले दिपायल विमानस्थलको स्तरोन्नतिपछि यहाँका नागरिकको सहजता तथा पर्यटक भित्र्याएर आयस्तर वृद्धि गर्नका लागि भए पनि नियमितरूपमा जहाज सञ्चालन हुनुपर्ने बताए ।

नेपाल नागरिक उड्डयन प्राधिकरणका निर्देशक राजन पोखरेलले दिपायल लगायतका यहाँका अन्य विमानस्थलमा नियमित जहाज सञ्चालनका लागि पहल भएको र अर्को हप्तादेखि यहाँ जहाज चल्न शुरू हुने बताए ।

उनले भने, ‘दिपायल, पाटन, चैनपुरमा नियमित विमान सञ्चालनका लागि सबै प्रक्रिया पूरा भएको छ, अर्को हप्तादेखि जहाज नियमित हुनेछ ।’

कालोपत्रको काम सकेर जहाजको पर्खाइमा रहेका यहाँका विमानस्थलमा नियमित जहाज सञ्चालन हुनसके यहाँको विकास हुनुका साथै पर्यटकको चहलपहल पनि बढ्नेमा यहाँका स्थानीय निकै आशावादी भएको दिपायल सिलगढी नगरपालिकाका नगर प्रमुख मञ्जु मलासीले बताइन् ।

उनले भनिन्, ‘राजधानी खोसिएर कैलाली सरेपछि यहाँका नागरिकमा निराशा छाएको छ, व्यापार–व्यवसायमा पनि मन्दी छाएको छ, अब जहाज चलाउन सके यहाँको विकास अवश्य हुनेछ ।’

तपाईको प्रतिक्रिया