भरतपुर, रासस

चितवन राष्ट्रिय निकुञ्जमा पर्यटकीय गतिविधि सञ्चालनमा आएको छ । कोरोनाका कारण झण्डै ६ महिना ठप्प रहेको गतिविधि पुनः सञ्चालनमा आएको हो ।

निकुञ्जका प्रमुख संरक्षण अधिकृत अणनाथ बरालले हात्ती सफारी, जंगलवाक र पंक्षी दृश्यावलोकन खुला भइसकेको बताए । उनले भने, ‘जीप सफारीका लागि बाटो मर्मत गर्दैछौं, दशैंअघिसम्म सञ्चालनको तयारीमा छौं ।’

उनले आन्तरिक पर्यटक फाट्टफुट्ट आउन थालेको भन्दै क्रमशः अवस्था सहज बन्दै जाने बताए । निकुञ्ज अन्तर्गतका सामुदायिक वनमा भने यसअघि नै पर्यटकीय गतिविधि खुला भइसकेका छन् ।

निकुञ्जले राप्ती नदीमा डुंगा सञ्चालनका लागि ठेक्का प्रक्रिया पनि अघि बढाएको निकुञ्जका सूचना अधिकारी अशोक रामले जानकारी दिए । उनले पदयात्रा मार्गको झाडी सरसफाइको काम पनि भइरहेको बताए ।

असोज, कात्तिक महिना निकुञ्ज घुम्न राम्रो मौसम मानिन्छ । यस वर्ष पर्यटकीय गतिविधि शून्य छ । क्षेत्रीय होटल संघ चितवन सौराहाका अध्यक्ष दीपक भट्टराईले निकुञ्जले प्रवेश खुला गरेपछि पर्यटकीय क्षेत्र चलायमान हुने बताए ।

उनले दशैंतिहारमा आन्तरिक पर्यटक आउने आशामा सौराहाका व्यवसायी रहेको जानकारी दिए ।

सौराहामा छुट लगायतका प्याकेजका कार्यक्रम पनि घोषणा भएको उनले बताए ।

गत वर्ष १ लाख ८२ हजार ४३५ पर्यटकले चितवन राष्ट्रिय निकुञ्ज घुमेका थिए । यसमध्ये ८९ हजार ४४१ नेपाली, १४ हजार २३९ सार्क राष्ट्रका र ७८ हजार ७५५ जना अन्य देशका थिए ।

गत वर्ष पर्यटनबाट मात्र १९ करोड ९२ लाख ५५ हजार ६८१ रुपैयाँ कमाएको निकुञ्जको यस वर्ष आम्दानी शून्य छ । निकुञ्जले पर्यटक प्रवेश शुल्क र डुंगा शयरको बोलपत्रमार्फत राजस्व संकलन गर्ने गरेको छ ।

विक्रम संवत् २०३० सालमा स्थापना भएको चितवन राष्ट्रिय निकुञ्ज नेपालको प्रमुख पर्यटकीय गन्तव्यको निकुञ्ज हो ।