छोराको स्मृतिमा अक्षयकोष

समाधान संवाददाता २०७७ असोज १८ गते १०:४९

समाधान संवाददाता, पोखरा

रामबजार घर भई बेलायत बस्दै आएका प्रेमबहादुर विक र कमला विकले छोराको स्मृतिमा पोखरा–१५ फलेपाटनस्थित सिद्ध माविमा अक्षय कोष स्थापना गरेका छन् ।

छोरा दीपकको पाँचौ वार्षिक पुण्यतिथि पारेर शनिबार कोष स्थापना गरिएको हो।

न्यून आय भएका, गरिब, जेहेन्दार विद्यार्थी तथा दैनिक ज्याला मजदुरी गर्दे आएकाका छोरछोरीको पढाइमा सहयोग पुर्‍याउन भन्दै विक दम्पत्तीले १ लाख १ हजार एकसय ११ रुपैयाँको कोष स्थापना गरेको हो ।

विक परिवारबाट स्वर्गीय दिपकका हजुरबुवा जंगबीर विश्वकर्माले नगदै रकम विद्यालय व्यवस्थापन समितिका अध्यक्ष शिवबहादुर भण्डारीलाई हस्तान्तरण गरे । साथै कोष सञ्चालन सम्झौता पत्रमा हस्ताक्षर गरे ।

दीपकका काका शिवलाल विश्वकर्माले कोषले थोरै मात्रामा भए पनि लक्षित विद्यार्थीको हितमा सहयोगी बन्ने विश्वास गरे । कोषको दुरुपयोग नहुनेमा पूर्ण विश्वस्त रहेको उनको भनाइ थियो ।

‘आर्थिक अभावमा कुनै पनि बालबालिका पढ्नबाट बन्चित नहोउन भन्ने चाहना हो,’ उनले भने ।

अक्षय कोष स्थापना कार्यक्रममा पोखरा–१५ का वडाध्यक्ष प्रकाश पौडेलले भावना अनुसार लक्षित विद्यार्थी लाभान्वित भएमात्र कोषको सार्थकता पूरा हुने बताए । सहयोगी दाताको भावनालाई आत्मसात् गर्दै कोष सञ्चालन हुने उनले जनाए ।

विद्यालय व्यवस्थापन समितिका अध्यक्ष भण्डारीले कोषको रकमको सही सदुपयोग गर्दै लक्षित विद्यार्थीमा पुर्‍याउने प्रतिवद्धता जनाए । सरकारी विद्यालयमा सहयोगी हातहरु फैलदै गएको भन्दै उनले खुसी व्यक्त गरे ।

प्रधानाध्यापक गुरुदत्त कोइरालाका अनुसार विद्यालयमा अधिकांश विद्यार्थी न्यून आय भएका, दैनिक ज्याला मजदुरी गर्नेका छोराछोरी रहेका छन ।

कतिपयले शैक्षिक सामग्रीको जोहोसमेत गर्न नसक्ने अवस्था भएपछि विद्यालयले त्यस्ता विद्यार्थीको भर्नालगायत, शैक्षिक सामग्री, ड्रेस, छात्रवृत्ति उपलब्ध गराउँदै आएको छ । तर विद्यालयसंग नियमित आम्दानीको स्रोत नभएपछि नियमावली बनाएर अक्षय कोष स्थापना गरिएको हो ।

२०७५ माघबाट सुरु कोषमा अहिलेसम्म झन्डै ३३ लाख रुपैया“ जम्मा भइसकेको छ । ‘यही रकमको ब्याजले लक्षित विद्यार्थीको पठनपाठनको व्यवस्थापन गर्छौं,’ उनले भने, ‘अक्षय कोषमा उत्साहजनक सहभागिताले विद्यालय उत्साहित छ ।

तपाईको प्रतिक्रिया