समाधान संवाददाता, पोखरा

सर्लाहीबाट २१ वर्षीय युवक गत मंसिरमा पोखरा आए । पोखरामा उनी दाइ नाता पर्नेकहाँ बास बसे ।

२ पुसमा घरका सबै सदस्य १४ वर्षीया छोरीलाई छोडेरकाममा बाहिर निस्किए ।

भतिजीले काकालाई सम्मानसाथ घरमा राखिन् । आफ्नै सम्झेर घरमा आतिथ्यता दिएका काकाले एकाएक उनलाई डरधम्की देखाए ।

राति साढे ९ बजे उनलाई ती काकाले बलात्कार प्रयास गरे । बालिकाले प्रतिकार गर्न खोजिन् तर सकिनन् ।

ती युवक केही दिन सोही घरमा बसेर गृह जिल्ला सर्लाही फर्किए । घटना गुपचुप नै रह्यो । पछि पीडित बालिकाको गर्भ बस्यो ।

२९ भदौमा परिवारका सदस्यले थाहा पाए । पेट दुख्यो भनेपछि घरका सदस्यले उनलाई पोखराकै अस्पताल लगे ।

अस्पतालमा उनले छोरा जन्माइन् । १४ वर्षीया छोरीले बच्चा पाएपछि उनका बुबा आमा आश्चर्यमा परे ।

त्यसपछि घरका सदस्यले सोधपुछ गर्दा काकाले आफूमाथि जबरजस्ती गरेको पीडित बालिकाले बताइन् ।

परिवारले जिल्ला प्रहरी कार्यालय, कास्कीमा जाहेरी दिए । जाहेरी परेपछि प्रहरीले अनुसन्धान अगाडि बढायो ।

आरोपित काकालाई कास्की प्रहरीले सर्लाही प्रहरीको समन्वयमा आइतबार पक्राउ गरेको छ ।

उनलाई सोमबार पोखरा ल्याइएको कास्की प्रहरी प्रवक्ता सुवास हमालले जानकारी दिए ।

पक्राउ परेका युवकमाथि कास्की जिल्ला अदालतबाट हाडनाता करणी कसुर अन्तर्गत ५ दिन म्याद थप गरी अनुसन्धान थालिएको डिएसपी हमालले बताए । आमा र शिशु दुवैजनालाई संरक्षण गृहमा राखिएको छ ।

फाइल फोटो