पुतलीबजारमा यातायात कार्यालय

समाधान संवाददाता २०७७ असोज २२ गते ११:०९

समाधान संवाददाता, स्याङ्जा

पुतलीबजारमा पूर्वाधार विकास कार्यालय अन्तर्गत यातायातको शाखा कार्यालय शुभारम्भ भएको छ ।

यातायात शाखा कार्यालयले पुतलीबजारको ट्राफिक चोकमा बुधबारबाट सेवा सुविधासहित कार्यालयको शुभारम्भ भएको हो ।

ट्राफिक चोकमा स्थापना भएको यातायात शाखाको कार्यालयबाट सवारी साधन दर्ता, सवारीहरुको जाँचपास, बिलबुक नवीकरण, रुट नवीकरण र रुट इजाजत सम्बन्धी कामहरु हुने पूर्वाधार विकास कार्यालयका प्रमुख लक्ष्मीप्रसाद भण्डारीले बताए ।

यातायात शाखाको कार्यालयबाट स्याङ्जा जिल्लाभरीका सेवाग्राही लगायत नवलपरासीको डेढगाउँ, पाल्पा रामपुर, पर्वत हुवास र पोखराका सेवाग्राहीले सेवा पाउने भण्डारीले जानकारी दिए ।

सेवा शुभारम्भ भएको अवसरमा पहिलो सेवाग्राही धुव्र पाठक र ओमप्रसाद पौडेललाई खादा लगाई सम्मान गरिएको थियो ।

पहिलो सेवाग्राही स्थानीय धु्रव पाठकले यातायातको कार्यालय स्याङ्जामा स्थापना भएकाले पोखरा धाउनुपर्ने बाध्यता हटेको सुनाए ।

उनले समयको बचत भएको बताउँदै लाइसेन्सको काम पनि स्याङजाबाट गर्न अनुरोध गरे ।

कार्यालय प्रमुख र लेखा अधिकृतको जिम्मा दुवैतिर हुने हँुदा यातायात शाखाको कार्यालय ७ जना कर्मचारीले काम गर्ने छन् ।

पूर्वाधार विकास कार्यालय र यस अन्तर्गतको यातायात शाखा कार्यालयको कार्यालय प्रमुख र लेखा अधिकृतले दुवै कार्यालय हेर्ने भएकाले पूर्वाधार विकास कार्यालय र यातायात शाखा अन्यत्र लैजान नसकिएने हो ।

तपाईको प्रतिक्रिया