स्याङखोलामा मोटरेबल पुल

समाधान संवाददाता २०७७ असोज २७ गते ९:४८

एसके थकाली, जोमसोम

बेनी—जोमसोम ७६ किमी सडकखण्ड अन्तर्गत मुस्ताङको सदरमुकाम जोमसोम जोड्ने स्याङ खोलामा पक्की मोटरेबलपुलको निर्माण कार्य पुरा भएको छ ।

राष्ट्रिय गौरवको काली गण्डकी करिडार आयोजना अन्र्तगतको पक्की मोटरेबलपुल बने पछि गतहप्ता देखि सवारी साधन ओहोर दोहोर गर्न थालेका छन ।

प्रि—स्ट्रेस प्रविधि मार्फत पहिलो पटक निर्माण गरिएको मोटरेबलपुल बेनी जोमसोम कोरला सडककै पहिलो पुल भएको आयोजनाका सूचना अधिकारी ईन्जिनीयर अश्विनीकुमार यादवले जानकारी दिए ।

तीन स्पानको पुलमा ४ वटा पिल्लर राखिएको छ । पुलको लम्बाई १ सय १५ मिटर र चौडाई ११ मिटर छ ।

मुक्तिनाथ श्रीगीता निर्माण जेभीले १० करोड ५२ लाख लागतमा पुल बनाएको हो ।

कालीगण्डकी करिडोर सुरुवात हुन पुर्व काम थालिएको पुल आयोजना सुरु भएपछि डिजाईन फेरिएको थियो । कम्पनीले २०७१ साल फागुन ९ गते पुल निर्माणको गरेको थियो ।

प्रि—सर्वे डिजाईन परिवर्तन, २०७२ सालको गोर्खाभुकम्प, भारतीय नाकाबन्दी र हिमपात लगायतका कारणले तोकिएको समयमा पुल पुरा हुन नसकेको ईञ्जिनीयर यादवले उल्लेख गरे ।

कम्पनीले कोरोना कहरको जोखिमका बावजुद मजदुर, उपकरण र निर्माण सामाग्री व्यवस्थापन गरी पुलको काम दशै अगावै सकेको ईन्जिनीयर यादवले बताए ।

स्याङखोला पक्की मोटरेबलपुल भएसंगै करिडोरमा ३ पुलको काम सकिएको हो । उपल्लो मुस्ताङ जोड्ने मुस्ताङ गेटको पक्की पुल पनि करिडोरकै सहयोगमा बनेको हो ।

आयोजना अन्र्तगत बारागुङ मुक्तिक्षेत्रको लुप्रा पान्डा खोला र म्याग्दीको अन्नपूर्ण गाउँपालिका ३ दाना घट्टे खोलाको पक्की पुल बनेको ईन्जिनीयर यादवले जानकारी दिए ।

निर्माण पुरा भएका ३ पुल करिडोरलाई हस्तान्तरणको चरणमा रहेको उनले बताए ।

उत्तरी कोरलानाका जोड्ने राष्ट्रिय गौरवको बेनी जोमसोम कोरला सडक आयोजना अन्र्तगत मालढुंगादेखि कोरलासम्म ३८ मोटरेबल आवश्यकता पर्ने सूचना अधिकारी ईन्जिनीयर यादवले जनाए ।

तिमध्ये १६ पुलको काम निर्माणाधिन अवस्थामा रहेको छ । बाँकी २२ पुलको सर्वे तथा डिजाईनको क्रममा रहेका छन ।

आयोजनाको बेनीजोमसोम सडकमा ८ र जोमसोम कोरला सडकमा ८ पक्की मोटरेबल निर्माणाधिन अवस्थामा रहेको ईन्जिनीयर यादवले उल्लेख गरे ।

उनका अनुसार यसवर्ष कोरोना कहर, बाढी पैरो तथा हिमपात लगायतका कारणले सडक तथा पुलको काम न्यून मात्र प्रगति भएको छ ।

दशै अगाडी नै सप्तकोशी जलाधार कन्ट्रक्सनले मुस्ताङको कोवाङदेखि मार्फासम्म कालोपत्रे गर्ने प्रतिवद्धता गरेको भएता पनि कोरोना कहरको कारण काम हुन नसकेको उनले जानकारी दिए ।

राष्ट्रिय गौरवको बेनी जोमसोम कोरला सडक २०७४ सालदेखि सुरु भएको हो ।

तपाईको प्रतिक्रिया