अर्जुन काफ्ले, स्याङ्जा

गल्याङ नगरपालिकाले अति विपन्न परिवारको घर बनाउने काम थालेको छ ।

नगरपालिकाको वडा नम्बर १ बाट शुरुवात गरिएको घर बनाउने अभियान वडानम्बर ५ रुपाखानीसम्मा विस्तार गरिएको छ ।

नगरपालिकाका सबै विपन्न परिवारको घर बनाउने योजना रहेको नगर प्रमुख भुपराज अधिकारीले बताए ।

उनले आर्थिक अभावले घर बनाउन नसकेका परिवारलाई एक वर्ष भित्रमा घर बनाएर हस्तान्तरण गर्ने जानकारी दिए ।

‘नगरपालिका भित्र अहिलेसम्म ७५ वटा घर बनाउनुपर्ने अवस्था रहेको छ,’उनले भने, ‘जस्तापाता दिएर पनि घर बनाउन नसक्ने परिवारका लागि नगरपालिकाले आफै घर बनाइदिन लागेको छ ।’

एउटालाई दुःख पर्दा अर्कोले सहयोग गर्ने संस्कृति लोप हुँदै गएको उल्लेख गर्दै नगरप्रमुख अधिकारीले संस्कृति र विकासलाई सँगसँगै जोड्नका लागि अभियान थालिएको बताए ।

गास बास र कपासको ग्यारेण्टी अब नगरपालिकाले लिने दावी गर्दै नगरप्रमुख अधिकारीले अबको दश वर्षसम्ममा नगरपालिकामा कोही गरिब नरहने ठोकुवा गरे ।

प्रमुख प्रशासकीय अधिकृत इश्वरीप्रसाद पाण्डेले नगर भित्रका अति विपन्न परिवारका लागि नगरपालिकाले थालेको अभियानमा सहभागी हुन सबैलाई आग्रह गरे ।

उनले विपन्नको घर निर्माणका लागि स्थानीयको उत्तिकै साथ र सहयोग हुनुपर्ने बताए ।

नगरपालिकाले घडेरी समेत नभएका विपन्न परिवारका लागि घडेरीको व्यवस्था गरेर घर बनाएर दिने योजना बनाएको छ ।

विपन्न परिवारका लागि आफ्नै लगानीमा आफै घर बनाएर हस्तान्तण गर्ने उदाहरणीय अभियान गल्याङ नगर पालिकाले ल्याएको छ ।