समाधान संवाददाता, गोरखा

उत्तरी गोरखाको धार्चे गाउँपालिकाको वडा नम्बर ४ लाप्राकको मणिकामदेवी माध्यमिक विद्यालयमा गण्डकी प्रदेशमै पहिलोपटक पर्यटन र पर्वतारोहण विषय पढाउन थालिएको छ ।

गत वर्ष अध्ययन अध्यापनको अनुमति पाएको विद्यालयले कक्षा ११ र १२ मा ति विषय पढाउन थालेको हो ।

कक्षा ११ मा अनिवार्य विषयवाहेक ४ ऐच्छिकको रुपमा ती विषयलाई समावेश गरिएको विद्यालयका प्रधानाध्यापक धनबहादुर गुरुङले जानकारी दिए ।

विद्यालयमा यसअघि मनोविज्ञान,शिक्षा, व्यवस्थापन र गणित पठनपाठन हुँदै आएको थियो । प्रधानाध्यापक गुरुङले पर्यटन र पर्वतारोहण विषय प्रति विद्यार्थीको आकर्षण समेत बढेको बताए ।

उनका अनुसार पहिलो वर्ष ती विषय पढ्ने विद्यार्थीको संख्या ४३ छ । पठनपाठनलाई प्रभावकारी बनाउन विद्यालय र नेपाल पर्वतीय प्रशिक्षण प्रतिष्ठानबीच सम्झौतासमेत भएको छ ।

ती विषय पढाउन दक्ष अनुभवी प्रशिक्षक तथा पाठ्यक्रम र अध्ययन सामग्रीहरु प्रतिष्ठानले उपलब्ध गराउने छ । पठनपाठनको सबै प्रबन्ध भने विद्यालयले मिलाउने सम्झौता भएको छ ।

सैद्धान्तिक पठनपाठनको अलवा विद्यालयले रक क्लाइम्बिङ, क्यानोनिङ, हिलक्लाइम्बिङ जस्ता प्रयोगात्मक संरचना तयार पारेको छ ।

गण्डकी प्रदेशका उद्योग, पर्यटन, वन तथा वातावरणमन्त्री विकास लम्साललेस्कुलतहमा ती विषय पढाएर विद्यालयले उदाहरणीय काम गरेको बताए ।

पर्यटन र पर्वतारोहण प्रदेशमा तालिम प्रशिक्षणको रुपमा चलाएको भएतापनि विद्यालय तहमा पठन पाठन नभएको उल्लेख गर्दै उनले साहसिक पर्यटनमा नेपालको भविश्य रहेको दावी गरे ।

धेरैलाई ज्ञान नहँुदा साहसिक पर्यटनको प्रवद्र्धन हुन नसकेको चर्चा गर्दै उनलेसाहसिक पर्यटनको क्षेत्रमा लगानीसमेत बढेको बताए । उनले विद्यालयबाट उत्पादन हुने नयाँ जनशक्तिको खपत देशको पर्यटन क्षेत्रमा हुने विश्वास व्यक्त गरे ।

गण्डकी प्रदेश सभा सदस्य धनञ्जय दवाडीले शिक्षालाई प्राविधिक, समय सापक्ष स्तरीय र व्यावहारिक बनाउन सुझाव दिए ।

गाउँपालिकाका अध्यक्ष सन्तोष गुरुङले पर्यटन र पर्वतारोहण विषय मास्टर डिग्रीसम्म अध्यापन गराउने योजना बनाएको जानकारी दिए ।

उनले पर्यटन र पर्वतारोहण पढाइ हुने क्याम्पससँग समन्वय गरेर स्थानीय विषयसमेत समावेश गरी पठनपाठन गर्ने योजना सुनाए ।