गोरखामा यो वर्ष देउसीभैलो खेल्न नपाइने

समाधान संवाददाता २०७७ कार्तिक २१ गते १६:२१

समाधान संवाददाता, पोखरा

गोरखामा यो तिहारमा देउसीभैलो खेल्न नपाइने भएको छ । जिल्ला प्रशासन कार्यालय गोरखाले शुक्रबार सूचना निकालेर कोरोना संक्रमण फैलिने जोखिम रहेको भन्दै तिहारमा देउसीभैलो खेल्ने, नाचगान गर्ने, पिङ हाल्ने र खेल्ने नगर्न आग्रह गरेको छ ।

तिहार आफू र आफ्नो परिवारसँगै मनाउन र विगतमा जस्तो आफन्तकहाँ जाने, भिड गर्ने काम नगर्न सूचनामा भनिएको छ ।

निमित्त प्रमुख जिल्ला अधिकारी देवी पाण्डे खत्रीले जारी गरेको सूचनामा जुवातास खेल्ने, पटका, आतिशवाजी र भुइचम्मा जस्ता विस्फोटक पदार्थ बिक्री र प्रयोग नगर्न पनि आग्रह गरिएको छ ।

कोरोना भाइरस संक्रमणविरुद्ध सचेतता नअपनाए संक्रामक रोग ऐन २०२० अनुसार र भुइचम्पा, पटका आतिशबाजी जस्ता विस्फोटक पदार्थको कारोबार र प्रयोग गरे स्थानीय प्रशासन ऐन २०२८ अनुसार कारबाही गर्ने चेतावनी पनि दिइएको छ ।

तपाईको प्रतिक्रिया