समाधान संवाददाता
पोखरा

गृहसचिव महेश्वर न्यौपानेले शान्ति सुरक्षा, विपद व्यवस्थापन लगायत कार्यमा उच्च मनोबलका साथ एकीकृत रुपमा कार्य गर्न निर्देशन प्रशासन र सुरक्षा निकायका प्रमुखलाई निर्देशन दिएका छन् ।

मुस्ताङको नेचुङमा बोर्डर आउट पोस्ट भवन शिलान्यासपछि स्थल मार्गबाट फर्केका सचिव न्यौपानेका साथमा सशस्त्र प्रहरी महानिरीक्षक शैलेन्द्र खनाल पनि छन् ।

गण्डकी प्रदेश अन्तर्गत पर्वत, बाग्लुङ र म्याग्दी जिल्लाका प्रमुख जिल्ला अधिकारीसहित सुरक्षा प्रमुखसँगको अन्तरक्रियामा गृहसचिव न्यौपानेले कार्य सम्पादन सम्झौता अनुरुप काम गर्न समेत निर्देशन दिए ।

कार्यक्रममा प्रमुख जिल्ला अधिकारीहरुले जिल्लाको समग्र सुरक्षाको अवस्था, सुरक्षा चुनौती, विपद व्यवस्थापन र कोभिड १९ संक्रमण नियन्त्रण तथा उपचारबारे प्रस्तुतीकरण गरेका थिए ।

कार्यक्रममा सशस्त्र प्रहरी महानिरीक्षक शैलेन्द्र खनालले विपद् व्यवस्थापन तथा शान्ति सुरक्षा कायम राख्न समन्वय र सहकार्य तथा एकीकृत सुरक्षा योजनाका साथ कार्य गरेमा मात्र उत्कृष्ट सफलता मिल्ने बताए ।

महानिरीक्षक खनालले ती जिल्लामा रहेका मातहत युनिटको निरीक्षण गर्ने क्रममा इमान्दार र अनुशासित ढंगले राज्यले दिएको जिम्मेवारी पूरा गर्न निर्देशन दिएका छन् ।