उत्पादनलाई बजार लैजान वालिङ नगरपालिकाले सहयोग गर्ने

समाधान संवाददाता २०७७ कार्तिक २२ गते ९:५७

समाधान संवाददाता, वालिङ

वालिङ नगरपालिकाले किसानको उत्पादन बजारीकरणका लागि सघाउने भएको छ ।

नगरका मेयर दिलीपप्रताप खाँणले व्यक्तिगत वा सामूहिकरुपमा उत्पादित कृषिजन्य वस्तुको उत्पादनमा जोड दिन किसानसँग आग्रह गरे । उनले उत्पादित वस्तुको बजारीकरणका लागि नगरपालिकाले आवश्यक सहयोग गर्ने प्रतिवद्वता जनाए ।

युएनडिपी नेपाल र वालिङ नगरपालिकाको आर्थिक सहयोगमा दियालो संस्थाले व्यवस्थापन गरेको ‘कोभिड १९ उद्धार र सामाजिक आर्थिक प्रतिकार्य परियोजना’ अन्तर्गत नगरभित्रका कोभिड १९ प्रभावित १ हजार किसान तथा विभिन्न उत्पादक सहकारीहरुलाई बिउबिजन तथा कृषि औजार वितरण गर्दै मेयर खाँणले आधुनिक कृषि प्रणालीका लागि आवश्यक तालिम तथा आधुनिक औजार, उपकरणहरु वितरण गर्दै जाने उल्लेख गरे ।

कार्यक्रममा वालिङ नगरपालिकाका विभिन्न वडाका १५ उत्पादक सहकारीमार्फत खेतीगरी उत्पादन बढाउने उद्देश्यले बिउबिजन तथा कृषि औजार हस्तान्तरण गरिएको दियालो संस्थाका अध्यक्ष कविता तिवारीले जानकारी दिइन् ।

कार्यक्रम अन्तर्गत संस्थाले नगरपालिकाका विभिन्न स्थानमा नर्सरी बनाउनुका साथै आवश्यकता अनुसार कृषि औजार वितरण गरेको छ । किसान तथा कोभिड प्रभावितहरुको मागका आधारमा तालिम समेत सञ्चालन भइरहेको छ ।

तपाईको प्रतिक्रिया