पुतलीबजारका प्रमुख प्रशासकीय अधिकृत ढकालकाे निधन

समाधान संवाददाता २०७७ कार्तिक २५ गते ८:३०

पाेखरा

पुतलीबजार नगरपालिकाका प्रमुख प्रशासकीय अधिकृत डाेलराज ढकालकाे निधन भएकाे छ ।

रक्त क्यान्सरकाे उपचार गराइरहेका उनी ५१ वर्षका थिए । पाेखरामा पिसिआर गराएर रिपाेर्ट नेगेटिभ आएपछि काठमाडाैं लगिएका उनकाे साेमबार मृत्यु भएकाे हाे ।

प्रमुख प्रशासकीय अधिकृत ढकालकाे निधनमा पुतलीबजार नगरपालिकाले शाेक विज्ञप्ति जारी गरी नगरपालिका र नेपालकाे निजामती क्षेत्रले एक कुशल र उच्च प्रशासनिक क्षमता भएकाे व्यक्ति गुमाउनु परेकाे उल्लेख गरेकाे छ ।

मेयर सीमाकुमारी क्षेत्रीले प्रमुख प्रशासकीय अधिकृत ढकालकाे निधनमा म‌ंगलबार एक दिन नगरपालिका कार्यालयमा बिदा राखिएकाे बताइन् ।

निमित्त प्रमुख प्रशासकीय अधिकृत बाबुराम बरालले विज्ञप्ति निकालेर मंगलबार नगरपालिका र मातहतका सबै कार्यालय बन्द रहने जनाएका छन् । विद्यालयहरुमा जारी परीक्षा भने बन्द नहुने विज्ञप्तिमा उल्लेख छ ।

ढकालकाे शव पाेखरा ल्याएर म‌ंगलबार बिहान पाेखराकाे शान्तिघाटमा दाहसंस्कार गरिएकाे छ ।

तपाईको प्रतिक्रिया