स्थायी कमिटीमा ओलिको पत्र – प्रचण्डले पेश गरेको प्रस्तावमा छलफल गर्न सकिन्न

समाधान संवाददाता २०७७ मंसिर २१ गते १६:२६

काठमाडौं

प्रधानमन्त्री एवं नेकपा अध्यक्ष केपी शर्मा ओलीले कार्यकारी अध्यक्ष पुष्पकमल दाहाल ‘प्रचण्ड’ले पेश गरेको प्रस्तावमा छलफल गर्न नसकिने दोहोर्‍याएका छन् ।

स्थायी कमिटी बैठकलाई लिखित्र पत्र पठाउँदै ओलीले प्रचण्डको प्रस्तावमा छलफल गर्ने बैठकमा उपस्थित हुन नसकिने बताएका हुन् ।

पार्टी केन्द्रीय कार्यालय धुम्बाराहीमा आइतबार बसेको बैठकमा उपप्रधानमन्त्री ईश्वर पोखरेलले ओलीको पत्र पढेर सुनाएका थिए ।

‘कमरेड ओलीले बैठकलाई पठाउनुभएको पत्र प्रारम्भमै ईश्वर पोखरेलले वाचन गरेर जानकारी गराउनुभयो । ओलीले पूर्व मान्यता अनुसार प्रचण्डको प्रस्ताव छलफल गर्न नसकिने र बैठकमा उपस्थित हुन नसकेको जानकारी गराउनुभएको थियो,’ बैठकपछि प्रवक्ता नारायणकाजी श्रेष्ठले भने ।

ओली उपस्थित नभएपछि स्थायी कमिटी बैठक मंसिर २८ गते र केन्द्रीय कमिटी पुस ५ गतेसम्मका लागि स्थगित भएको छ ।

तपाईको प्रतिक्रिया