एसके थकाली, जोमसोम

सेन्चुरी कमर्सियल बैंकले आफ्नो ११५ औं शाखा विस्तार गरेको छ । तल्लो मुस्ताङको थासाङ गाउँपालिका ३ लेतेमा बैंकले नयाँ शाखा विस्तार गरेको हो ।

मुस्ताङबाट निर्वाचित संघीय सांसद प्रेमप्रसाद तुलाचनको विशेष पहलमा लेतेमा पहिलो पटक बैंक सन्चालनमा आएको हो ।

बैंकको गण्डकी प्रदेशका सांसद महेन्द्रबहादुर थकालीले आइतबार उदघाटन गरे ।

सो अवसरमा सांसद थकालीले बैंकले नागरिकलाई छिटो छरितो रुपमा
बैंकिङ सेवा उपलब्ध गराउनुपर्नेमा जोड दिए ।

बैंकको वित्तीय सेवासँगै थासाङ गाउँपालिकाअन्तर्गत वडा नम्बर ३, ४ र ५ को लेते, घासा, छयो, टिटि, झिप्रा देउराली, कुन्जो र ताक्लुङ लगायतका गाउँका स्थानीय लाभान्वित हुने विश्वास गरिएको छ ।

लेतेका नरसिंह शेरचनले कृषि, पशुपालन र पर्यटन व्यवसायमा आश्रित स्थानीयलाई बैंकिङ कारोबार गर्न सहज हुने बताए ।

यसअघि त्यस क्षेत्रका बासिन्दालाई वित्तीय सेवा पाउन सदरमुकाम जोमसोम र गाउँपालिका केन्द्र कोवाङ पुग्न पर्ने बाध्यता थियो ।

मुस्ताङमा बैंकको शाखा स्थापनासँगै स्थानीयलाई निक्षेप बचत, कर्जा लगानी र एटिएम लगायत सेवा उपल्ब्ध हुने बैंकका क्षेत्रीय प्रबन्धक रमेश बन्जाराले बताए ।

बैंकले ग्रामिण भेकका जनताको सुविधाका लागि शून्य मौज्तादमा ६ महिनासम्म खाता खोल्ने प्रबन्धक बन्जाराले जनाए ।