पर्यटक बोलाउन निस्किँदै पोखरेली पर्यटन व्यवसायी

समाधान संवाददाता २०७७ मंसिर २४ गते ७:००

समाधान संवाददाता, पोखरा

कोभिड–१९ को संक्रमणसँगै उत्पन्न विषम परिस्थितिले थिलोथिलो भएको पर्यटनलाई जगाउने उद्देश्यले पश्चिमाञ्चल होटल संघ पोखराले जाउँ है पोखरा अभियान २०७७ लाई पुनः अगाडि बढाउने भएको छ ।

खासगरी आन्तरिक पर्यटनलाई पुनर्उत्थान गर्ने उद्देश्यले नेपाल पर्यटन बोर्डसँग मिलेर यस्तो अभियानलाई बुधबारदेखि निरन्तरता दिन लागिएको संघका अध्यक्ष विकल तुलाचनले जानकारी दिए ।

मंसिर २४ देखि २७ गतेसम्म सञ्चालन हुने अभियान अन्तर्गत जनकपुर, पर्सा, वीरगञ्ज, विराटनगर र चितवनलाई समेटिएको उनले सुनाए । अभियान अन्तर्गत पत्रकार सम्मेलन तथा प्रदेशस्तरीय र स्थानीय सरकारी तथा गैरसरकारी अधिकारीहरुसँग अन्तरक्रिया कार्यक्रम हुने अध्यक्ष तुलाचनले स्पष्ट पारे ।

नेपालमा सरकार र विद्रोही पक्षबीच द्वन्द्व जारी रहेकै अवस्थामा संघले १८ वर्ष अघि सुरुवात गरेको जाउँ है पोखरा अभियानले यसपटक कोभिड १९ बाट थला परेको पर्यटनलाई जगाउने मुख्य उद्देश्य लिएको आन्तरिक पर्यटन पुनर्उत्थान समिति गण्डकीका सहसंयोजक समेत रहेका तुलाचनले बताए ।

यात्रामा होटल सञ्चालक, अन्य पर्यटनकर्मी, नेपाल पर्यटन बोर्डका प्रतिनिधि र संचारकर्मी गरी १५ जनाको सहभागिता रहेको छ । सन् २०१९ को डिसेम्बर अन्त्यतिर चीनको युनान प्रान्तमा पहिलोपटक देखिएको बताइने कोरोना भाइरसका कारण लाग्ने कोभिड–१९ रोगका कारण अहिले विश्व जगत नै नकारात्मक रुपमा प्रभावित छ ।

विश्व स्वास्थ्य संगठनले यस रोगलाई महामारी घोषणा गरेपछि आन्तरिक र अन्तर्राष्ट्रिय रुपमा नै मानिसको आवागमन ठूलो प्रभाव परेको छ ।

महिनौ लामो लकडाउनले व्यवसाय बन्द हुँदा थुप्रै व्यवसायी पलायन भएका छन् । कतिपयले घरभाडा र बैंकको सावाँ र ब्याज तिर्न सकेका छैनन् । धेरैले रोजगारी गुमाएका छन् । कतिको ज्यानै पनि गएको छ ।

नेपालले भोगेको १० बर्षे आन्तरिक द्वन्द्वको समयमा समेत नेपाली पर्यटन यति डरलाग्दो गरी प्रभावित भएको थिएन । महाभूकम्पपछि पनि पर्यटन क्षेत्र जसोतसो उठेको हो । कालो बादलमा पनि चाँदीको घेरा हुन्छ भन्ने नेपाली उक्ति छ ।

सोही उक्ति अनुसार आसाको उज्यालो खोज्ने प्रयासमा यो अभियान रहेको व्यवसायीले बताएका छन् । कोभिड १९ को संक्रमण विद्यमान रहँदा पोखरेली पर्यटनले भोग्नु परेको समस्याबारे अवगत गराउने र आन्तरिक रुपमा घुम्नका लागि प्रेरित गर्ने उद्देश्य पनि समेटिएको छ ।

विभिन्न वर्ष र विभिन्न चरणमा पूर्वी नेपाल देखि सुदुर पश्चिम सम्म नै यात्रा गरी अभियानलाई विगतमा पनि संघले प्रभावकारी रुपमा सञ्चालन गरेको थियो ।

जाउँ है पोखरा अभियानले नेपालमा आन्तरिक पर्यटनको माहोल सिर्जना गर्न सफल भए पनि अहिले कोरोना भाइरसका कारण पर्यटन ठप्पजस्तो हुन पुगेको अवस्थामा अभियान अगाडि बढाउन लागिएको हो ।

तपाईको प्रतिक्रिया