रामशरण नेपाली, लेखनाथ

लेखनाथ उद्योग वाणिज्य संघले पोखरा २७ को महोत्सवस्थल परिसरमा निर्माण गरेको कृषि उपज खरिद बिक्री केन्द्रलाई सहयोग पुग्ने गरी कोल्डस्टोर निर्माण हुने भएको छ । कृषि उपज उपभोक्तासम्म नपुगुन्जेल सुरक्षित भण्डारण गर्न कोल्डस्टोर निर्माण गर्न लागिएको हो ।

गण्डकी प्रदेश निर्वाचन क्षेत्र पूर्वाधार विकास कार्यक्रममार्फत कोल्डस्टोर निर्माण गरिने भएको छ । लेखनाथ उद्योग वाणिज्य संघले हरेक वर्ष जस्तै गर्दै आएको लेखनाथ महोत्सव यो वर्ष कोरोना भाइरसका महामारीका कारण स्थगित भएपछि महोत्सव सञ्चालनको मिति पुस १ गतेको सम्झना गर्दै कोल्डस्टोर स्थापनाको घोषणा गरिएको हो ।

कोल्डस्टोर स्थापनाका लागि पोखरा महानगरपालिका, संघीय सांसद विकास कोष र लेखनाथ उद्योग वाणिज्य संघको संयुक्त लगानी रहनेछ । कोल्डस्टोरका लागि करिब २७ लाख ५० हजार रुपैयाँ लाग्ने अनुमान छ ।

कृषि उपज खरिद बिक्री केन्द्रका २६ वटा सटरमा रहने कृषि उत्पादनको बिक्री वितरणमा सहज हुने गरी गण्डकी प्रदेश निर्वाचन क्षेत्र पूर्वाधार विकास कोषको सांसद दीपक कोइरालामार्फत विनियोजित २५ लाख र संघको २ लाख ५० हजारको लगानीमा कोल्डस्टोर निर्माण गरिने भएको हो ।

गण्डकी प्रदेश अर्थ तथा विकास समितिका सभापति दीपक कोइरालाले विकास भनेको बाटोघाटोमात्र नभई आय आर्जनका लागि उत्पादनसँग जोडिएर आर्थिक गतिविधिलाई पनि अगाडि बढाउनुपर्ने सुझाव राखेका थिए ।

भारतबाट नआए चीनबाट आउँछ भन्दै उत्पादनलाई बढवा नदिँदापछि परेको प्रसंग उठाउँदै विकास समितिका सभापति कोइरालाले सकेसम्म आफूलाई आवश्यक पर्ने आवश्यक खाद्य सामग्री आयात नगरी आफैले उत्पादन गर्नुपर्ने बताए ।

सोही अवसरमा नेपाल उद्योग वाणिज्य महासंघका केन्द्रीय सदस्य बाबुराम गिरीले सरकार र निजी क्षेत्रको सहकार्यमा वाणिज्य क्षेत्रका उद्योग धन्दाभन्दा पनि कृषिमा आधारित उद्योगधन्दा सञ्चालनतर्फ सोच्नुपर्ने सुझाव राखे ।

कार्यक्रममा लेखनाथ उद्योग वाणिज्य संघका अध्यक्ष बलराम ढकालले स्थानीय स्तरमा उत्पादित कृषिजन्य वस्तुलाई बजारीकरण गर्नुपूर्व व्यवस्थित तरिकाले भण्डारण र किसानको लगानीलाई सुरक्षित गर्न संघ कृषिमैत्री कार्यक्रममार्फत अगाडि बढेको धारणा राखेका थिए ।

संघका महासचिव गोपिचन्द्र बास्तोलालले सञ्चालन गरेको कार्यक्रममा वरिष्ठ उपाध्यक्ष छत्रधर आत्रेयले धन्यवाद ज्ञापनसहित कृषि उपज खरिद बिक्री केन्द्र र कोल्डस्टोरको महत्व र उपयोगिताबारे जानकारी गराएका थिए ।