किसानलाई हाते ट्याक्टर
समाधान संवाददाता, पुतलीबजार
स्याङ्जाको आँधीखोला गाउँपालिकाले पालिकाका कृषकलाई ५० प्रतिशत अनुदानमा ८० वटा हाते ट्याक्टर वितरण गरेको छ ।
किसानलाई कृषि पेशाप्रति आकर्षित गर्दै परम्परागत कृषि प्रणालीलाई यान्त्रीकरण र व्यवसायीकरण गर्ने उद्देश्यले हाते ट्याक्टर वितरण गरिएको हो ।
किसानलाई खेती गर्न सहज होस् भनेर अनुदानमा हाते ट्याक्टर प्रदान गरिएको गाउँपालिका अध्यक्ष सुधीरकुमार पौडेलले बताए ।
‘गाउँमा गोरु पाल्ने चलन हराइसक्यो । काम गर्ने मान्छे पनि छैनन्,’ उनले भने, ‘कृषि सरल र सहज बनाउन किसानलाई ट्याक्टर दिएका हौं ।’
कृषिमा यान्त्रीकरण, व्यवसायीकरण र बजारीकरण गर्नुपर्ने भन्दै यसका लागि किसानलाई सहयोग गरिएको अध्यक्ष पौडेलले बताए ।
उपाध्यक्ष शर्मिलादेवी पौडेलले स्वदेशमै कृषि पेसा गरेर मनग्य आम्दानी गर्न सकिने भएकाले विदेशिएका युवालाई स्वदेशमा फर्कन आग्रह गरिन् ।
गाउँपालिकाले कृषिमा आत्मनिर्भर बनाउने योजनाका साथ नीति कार्यक्रम बनाई काम गरिरहेको उनको भनाइ छ ।
प्रमुख प्रशासकीय अधिकृत शेषकान्त पौडेलले आ.व २०७७ ७८ को बजेटबाट कृषि र पशुपालनलाई पहिलो प्राथमिकतामा राखेकाले युवालाई कृषि पेसामा लाग्न आग्रह गरे ।
प्रतिट्याक्टर ५५ हजारमध्ये किसानले २७ हजार ५ सयमा ट्याक्टर प्राप्त गरेका हुन् ।
किसानको अत्यधिक माग भएकाले गाउँपालिकाले बजेट थप गरी दोस्रो चरणमा थप २५ किसानलाई ट्याक्टर वितरण गर्ने पालिकाले जनाएको छ ।
तपाईको प्रतिक्रिया