माउन्ट केटु आरोहीलाई पोखरामा नागरिक अभिनन्दन गरिने

समाधान संवाददाता २०७७ माघ २४ गते १२:५१

समाधान संवाददाता, पोखरा

पोखरा पर्यटन परिषद्ले पाकिस्तानमा रहेको विश्वको दोस्रो अग्लो माउन्ट के२(८६११मिटर) हिमाल सफल आरोहण गर्ने नेपाली टोलीलाई नागरिक सम्मान तथा अभिनन्दन गर्ने भएको छ ।

पोखराका पर्यटनसँग सम्बन्धित संघ, संस्थाको सहकार्यमा धम्पुस पिक (थापा पिक ६०१२मिटर)को सफल आरोहण गर्ने टोलीलाई समेत अभिनन्दन गर्ने परिषद्का अध्यक्ष गोपीबहादुर भट्टराईले जानकारी दिए ।

उनले दुबै टोलीलाई माघ २६ गते सोमबार पोखरा विमाननस्थलमास्वागत गरी बाजागाजासहित नगर परिक्रमा गराइने बताए । आरोही दलका सदस्यलाई पृथ्वीचोक, चिप्लेढुंगा, महेन्द्रपुल, न्युरोड, जिरोकिमी हँुदै बजार घुमाएर लेकसाइडमा समारोह गर्ने तयारी छ ।

परिषद्का महासचिव रामचन्द्र शर्माका अनुसार निर्मल पुर्जाको आरोहण दलमा रहेका मिङमाडेविट शेर्पा, मिङमातेन्जी शेर्पा, ग्याल्जेन शेर्पा, पेमचिरी शेर्पा दाबातेम्बा शेर्पाले गत माघ २ गते केटु हिमाल आरोहण गरेका थिए । अर्को आरोहण दलमा मिङमाजी शेर्पा, दाबातेन्जिङ शेर्पा र किलुपेम्बा शेर्पा छन् । सेभेन समिटमा सोना शेर्पाले केटु हिमालको सफल आरोहण गरेका थिए ।

नेपाल पर्वतारोहण संघ गण्डकी प्रदेशको आयोजनामा गत माघ ३ गते गण्डकी प्रदेशका टासीपासाङ गुरुङ, मन गुरुङ, सनकुमार जुग्जाली, दिपेशबाबु सुवेदी, सुदीप गौतम र हिराकुमारी मल्लले धम्पुस पिक सफल आरोहण गरेको महासचिव शर्माले जानकारी दिए ।

अध्यक्ष भट्टराइले नेपाली आरोहीले पहिलो पटक हिउँद याममा केटु हिमाल आरोहण गरी इतिहास रच्न सफल भएको जानकारी दिए । ‘८ हजारभन्दा माथिका हिमालमध्ये केटु हिमालमात्र हिउँदमा आरोहण हुन सकेको थिएन,’ अध्यक्ष भट्टराइले भने, ‘त्यस महान कार्यले विश्वमा नै नेपाल र नेपालीको वीरतालाई सधै र सदाको लागि अविश्मरणीय बनाएको छ ।’

उनले केटु हिमाल आरोहण दलमा वल्र्ड रेकर्ड अफ गिनिज बुकमा नाम लेखाउन सफल आरोहीसमेत रहेको जानकारी दिए । उनले ख्याति प्राप्त आरोहीको अभिनन्दनले पर्वतीय पर्यटन क्षेत्रका लागि दीर्घकालीन फाइदा पुग्ने विचार राखे ।

पोखरा पर्यटन परिषद् उपाध्यक्ष पोमनारायण श्रेष्ठले पर्यटन व्यवसायीलेहिमाल आरोहीलाई प्रोत्साहन गरेर पर्वतीय पर्यटन र हिमाल आरोहणको क्षेत्रमा जागरण ल्याउने उल्लेख गरे ।

ट्रेकिङ एजेन्सिज एसोसियसन पश्चिमाञ्चल अध्यक्ष तथा कार्यक्रम संयोजक सुशील पौडेलले केटु हिमालको आरोहीदललाई पाकिस्तान र नेपाल सरकारले राष्ट्रिय सम्मान गरिसकेको बताए । सन १९५०देखि माउन्ट अन्नपूर्णको हिमाल आरोहणको ७० वर्षको पूरा भएको उल्लेख गर्दै उनले पर्यटन व्यवसायीको प्रयासले पर्वतीय पर्यटनको प्रवद्र्धनमा सहयोग पुग्ने दाबी गरे ।

नेपाल पर्वतारोहण संघ गण्डकी प्रदेश अध्यक्ष तथा कार्यक्रमका सहसंयोजक शेषकान्त शर्माले हिमाल आरोहण गर्दा पहिला सुरक्षा र स्वास्थ्यलाई ध्यान दिनुपर्ने बताए ।

हिउँदमा हावाको गति बढी र व्यवस्थापनमा कठिनाइ हुने भएकाले हिमाल आरोहण बढी चुनौतीपूर्ण भएको उल्लेख गर्दै प्रदेशका हिमालको प्रोफाइल तयार नभएको जानकारी दिए ।

उनले प्रदेशका ६ हजारभन्दा उचाइका हिमालको बजारीकरण गर्नुपर्ने सुझाव दिए । उनले हिमाल आरोहणको अनुमति, अभ्यास प्रशिक्षण लगायतका गतिविधि बढाउनुपर्ने समेत औंल्याए ।

तपाईको प्रतिक्रिया