टाइगर कपबाट १९ लाख ३० हजार बचत

समाधान संवाददाता २०७७ फागुन १६ गते १६:५७

समाधान संवाददाता, पोखरा

टाइगर ग्रुप अफ पोखरा नेपालले आयोजना गरेको प्रथम टाइगर कप महिला तथा पुरुष भलिबल प्रतियोगिताबाट १९ लाख ३० हजार ४१ रुपैयाँ बचत भएको छ ।

गत माघ २७देखि फागुन १सम्म पोखरा रंगशालामा भएको प्रतियोगिताबाट ५४ लाख ४१ हजार ८ सय ३५ रुपैयाँ आम्दानी तथा ३५ लाख ११ हजार ७ सय ९४ रुपैयाँ खर्च भएको संस्थाका अध्यक्ष नारायणप्रसाद शर्माले जानकारी दिए ।

प्रतियोगिताका लागि गण्डकी प्रदेश सरकार मुख्यमन्त्रीको कार्यालयले १ लाख ५० हजार रुपैयाँ, राष्ट्रिय खेलकुद परिषद्ले १ लाख रुपैयाँ, पोखरा महानगरपालिकाले १ लाख रुपैयाँ, अन्नपूर्ण गाउँपालिकाले १ लाख रुपैयाँ आर्थिक सहयोग गरेको छ ।

विभिन्न व्यक्ति तथा संस्थाले ३९ लाख ३६ हजार८ सय ३५ सहयोग गरेको अध्यक्ष शर्माले जनाए । ग्रुपले प्रतियोगिताको टिकटबाट १० लाख ५५ हजार रुपैयाँ आम्दानी गरेको छ ।

प्रतियोगिताको आयव्यय सार्वजनिक गर्दै अध्यक्ष शर्माले बचत रकम सामाजिक तथा खेलकुद विकासका लागि खर्च गरिने बताए । उनले प्रतियोगिताको आम्दानी, खर्च विवरणलाई थप पारदर्शी बनाउन सहयोगदाताको नाम तथा सहयोग रकम सार्वजनिक गरेको जानकारी दिए ।

‘सबै पक्षको सहयोग र सद्भावले प्रतियोगिता ऐतिहासिक र भव्य रुपमा सफल भएको छ,’ अध्यक्ष शर्माले भने, ‘कोरोना कहरले थला परेको नेपाली खेलकुद र पोखराको खेल पर्यटन प्रवद्र्धनका लागि प्रतियोगिताले महत्वपूर्ण भूमिका खेलेको छ ।’ उनले प्रतियोगिताको लागि सहयोग गर्ने सबैप्रति आभार प्रकट गरे ।

आगामी वर्षसमेत प्रतियोगितालाई निरन्तरता दिने जानकारी दिँदै अध्यक्ष शर्माले सबैको हातेमालो र विश्वभरी छरिएका टाइगर ग्रुपका सदस्यको आत्मीय सहयोगले प्रतियोगिता सफल भएको बताए ।

कार्यक्रममा टाइगर ग्रुपले बागलुङ बडीगाड गाउँपालिकाको १ अशक्त परिवारलाई ५० हजार रुपैयाँ सहयोग गरेको छ । पालिकाका स्वर्गीय टोपबहादुर विकको परिवारलाई पोखरा छोरेपाटन माध्यमिक विद्यालय २०४६ को एसलसी ब्याच समूहमार्फत रकम प्रदान गरेको हो । समूहका अध्यक्ष तथा पत्रकार राजु क्षेत्रीमार्फत विकको परिवारलाई रकम हस्तान्तरण गरिनेछ ।

कार्यक्रममा राष्ट्रिय खेलकुद परिषद (राखेप) सदस्य राजेश गुरुङले सो परिवारलाई २१ हजार रुपैयाँ सहयोग गरे । परिषदका सदस्य गुरुङले भलिबल प्रतियोगिताले पोखराको खेलकुदमा नयाँ उत्साह थपेको बताए ।

तपाईको प्रतिक्रिया