समाधान संवाददाता, पोखरा

फेवातालको अहिले बाँध मर्मत सकिसँगै तालमा पानी भर्न सुरु गरिएको छ । गत शुक्रबारदेखि पानी भर्न सुरु गरिएको हो ।

बाह्य स्रोतबाट नभई फेवातालको मुहान हर्पन खोला र आकासे पानी नै अहिले तालको सतह पुरानै अवस्थामा फर्काउन प्रयोग गरिएको कार्यालय प्रमुख इन्जिनियर किरण आचार्यले जानकारी दिए । ताललाई पुरानै स्वरुपमा फर्काउन १ दशमलव ४५ मिटर पानी भर्नुपर्ने हुन्छ ।

पछिल्लो ५ दिनमा ० दशमलव ५ मिटर पानी भरिएको र अबको २२ दिनदेखि १ महिनामा ताल पुरानै अवस्थामा फर्किने इन्जिनियर आचार्यले बताए ।

फेवातालबाट गत २४ माघमा करिब ६ करोड लिटर पानी बगाइएको थियो । ‘पानीको सतह बढ्न सुरु भइसकेको छ । पछिल्लो ३/४ दिन पानी प¥यो । खास १५ दिनमा ० दशमलव ५ मिटर पानी बढ्नुपर्ने हो,’ उनले भने, ‘पानी परेकाले ३/४ दिनमै ० दशमलव ५ मिटर भयो । अब २२ दिनदेखि १ महिनामा पुरानै अवस्थामा फर्किन्छ ।’

२०३४ सालमा बाँधिएको बाँध पहिलोपटक ठूलो खर्चमा मर्मत गरिएको हो । तालको बाँध र सिँचाइ नहर मर्मत गर्न २ करोड रुपैयाँमा पर्वतको हरिबसु निर्माण सेवा प्रालिले ठेक्का लिएको थियो । बाँधको सामान्य मर्मत भने आवश्यकता अनुसार वर्षेनी भइरहन्छ ।

फेवातालको आकार बढाउन पहिलोपटक २०१८ सालमा बाँधिएको बाँध २०३१ सालमा फुटेको थियो । त्यसपछि हाल प्रयोगमा रहेको बाँध बनाइएको हो । अब २५ वर्षसम्मलाई ठूलो खालको मर्मत गर्नु नपर्ने इन्जिनियर आचार्यले बताए । ‘रेगुलर मर्मतचाहिँ २ देखि ५ वर्षमा गरिराख्नुपर्छ । पिरियोडिक मर्मत १० देखि २५ वर्षमा गर्दा हुन्छ,’ उनले भने ।