हिमालय अस्पतालमा आँखाको सिटी स्क्यान

समाधान संवाददाता २०७७ चैत ४ गते ११:५२

पोखरा, ३ चैत

हिमालय आँखा अस्पताल धेरै उपकरण र साधन स्रोतले भरिभराउ भए पनि बितेको एक वर्ष एउटा उपकरण थिएन, ओसिटी एन्जिओग्राफी गर्ने मेसिन । त्यो मेसिन नहुँदा आँखाको रेटिनाको सिटीस्क्यान यो अस्पतालमा सम्भव थिएन । भएको मेसिन बिग्रिएपछि एक वर्षयता आँखाको सिटीस्क्यान गराउन अस्पतालले बिरामी अन्तै पठाउनुपथ्र्याे ।

रोटरी इन्टरनेसनलले उक्त मेसिन आँखा अस्पताललाई उपलब्ध गराएको छ ।

रोटरीका अन्तर्राष्ट्रिय निर्वाचित अध्यक्ष शेखर मेहताले मंगलबार उक्त मेसिन अस्पताललाई हस्तान्तरण गरे । १ करोड रुपैयाँ पर्ने उक्त मेसिन रोटरी ग्लोबल ग्रान्ड अन्तर्गत हस्तान्तरण भएको हो । अन्तर्राष्ट्रिय अध्यक्ष नै नेपाल आएको मौका पारेर मेसिन हस्तान्तरण गरिएको हो ।

अस्पतालकी कामु मेडिकल निर्देशक डा इलिया श्रेष्ठका अनुसार आँखाको रेटिनासम्बन्धी समस्या लिएर दैनिक १०० बिरामी आउँछन् ।

‘तीमध्ये २०÷२५ जनाको आँखाको सिटीस्क्यान गर्नुपर्छ,’ उनले भनिन् । आँखाको पर्दामा पानी जमेको, रगत जमेको, प्वाल परेको लगायत समस्या पत्ता लगाउन उक्त मेसिन जरुरी पर्ने डा. श्रेष्ठले जानकारी दिइन् । खास गरी हाइपरटेन्सन र मधुमेहका बिरामीको आँखाको जाँचमा यस्तो मेसिन आवश्यक हुन्थ्यो ।

रोटरी क्लब अफ पोखरा मिडटाउनको पहलमा उक्त मेसिन आँखा अस्पताललाई प्रदान गरिएको हो । रोटरी इन्टरनेसनलका निवर्तमान डिस्ट्रिक गभर्नर किरणलाल श्रेष्ठले क्लबका अहिलेका अध्यक्ष शेखर मेहताले भारतमा निरक्षरता अन्त्यको अभियान चलाइरहेको र अहिलेसम्म १५ वटा आँखा अस्पताल स्थापना गरिसकेको जानकारी दिए ।

अस्पतालका अध्यक्ष वरिष्ठ अधिवक्ता कृष्ण गुरुङले नारारहित अस्पतालले उक्त मेसिनको आम्दानी मर्मतका लागि पनि छुट्याउने बताए । ‘यो मेसिन जनताकै लागि समर्पित गर्छाैं, मर्मतका लागि आवश्यक पैसा जुट्ने गरीमात्रै शुल्क राख्छौं,’ उनले भने ।

आइकेयर फाउन्डेसन नेदरल्यान्डले जन्माएर हुर्काएको अस्पताल अचेल भने नेत्रज्योति संघ अन्तर्गत सञ्चालन भइरहेको पनि अध्यक्ष गुरुङले सुनाए । रोटरी इन्टरनेसनलका लागि सन् २०२२—२३ का अध्यक्ष शेखर मेहताले हरेक १०० किलोमिटरमा एउटा आँखा अस्पताल हुनुपर्ने बताए ।

उनले भारतमा आफूले निर्माण गरेका अस्पतालको अनुभव अनुसार ५०÷६० लाख रुपैयाँ खर्च गरे पुग्ने पनि सुनाए । ‘ससाना उपचार हुने अस्पताल सबैतिर हुनुपर्छ, हिमालय जस्तो अस्पताल केही भए पुग्छ,’ उनले भने ।

रोटरी क्लब अफ पोखरा मिडटाउनका विनोद हेज्यूले हस्तान्तरण गरिएको मेसिनको टिकाउका लागि पनि सोच्नुपर्ने र मर्मतका लागि खर्च जोगाउनुपर्ने बताए ।

रोटरी क्लब अफ पोखरा मिडटाउनका अध्यक्ष जयमोहन भट्टराईको अध्यक्षतामा भएको कार्यक्रम सञ्चालन उपेन्द्र पौडेलले गरेका थिए ।

तपाईको प्रतिक्रिया