समाधान संवाददाता, पोखरा ।

एमाले नेता पृथ्वीसुब्बा गुरुङ नेतृत्वको गण्डकी प्रदेश सरकार परिवर्तनका लागि कम्मर कस्न लागेको नेपाली कांग्रेस गण्डकी प्रदेश संसदीय दलको बैठक आज सोमबार दिउसो १ बजे बस्दैछ ।

संसदीय दलका नेता कृष्णचन्द्र नेपालीले बैठक बोलाएका हुन् । गुरुङ नेतृत्वको सरकारमा रहेका माओवादी केन्द्रका २ जना मन्त्री फिर्ता भएपछि सरकार परिवर्तनको खेल सुरु भएको हो ।

राष्ट्रिय जनमोर्चाले समर्थन जनाईरहेको अवस्था अरु सबै दल एकै ठाउमा हुँदा पनि नढल्ने अवस्थामा रहेको गुरुङ सरकारमा शनिबारदेखि भने भुइचालो आएको छ ।

जनमोर्चाका अध्यक्ष चित्रबहादुर केसीले समर्थन फिर्ता लिने र अविश्वासको पक्षमा हस्ताक्षर गर्ने भन्दै समाधानसँग टेलिफोन वार्ता गरेपछि परिस्थिति एकाएक परिवर्तन आएको हो ।

यद्यपि अध्यक्ष केसीले भने जसरी जनमोर्चाले निर्णय लिइसकेको छैन । आईतबार जनमोर्चा गण्डकी प्रदेश संसदीय दलको बैठक बसे पनि ठोस निर्णय लिन सकेको छैन । पार्टीको केन्द्रले पनि कुनै निर्देशन पठाएको छैन ।

कांग्रेस निकटस्थ श्रोतका अनुसार कांग्रेसको केन्द्रीय नेतृत्वले पनि औपचारिक रुपमा गण्डकी प्रदेशमा के गर्ने र नगर्ने भन्ने बारेमा कुनै निर्देशन दिएको छैन् ।

यही अन्यौलकाबिच कांग्रेस संसदीय दलको बैठक बस्दैछ । १ बजे बस्ने बैठकमा पछिल्लो विकसित परिस्थिति मै बारेमा छलफल हुने सांसद कुमार खड्काले जानकारी दिए ।