मुस्ताङमा कोरोनाः परीक्षा रोकियो, हवाई सेवा बन्द
कोरोनाको दोस्रो लहर फैलिने जोखिम बढेपछि मुस्ताङका ५१ सामुदायिक विद्यालयको पठनपाठन र परीक्षा प्रभावित भएको छ
सुन्दरकुमार थकाली, जोमसोम
कोरोनाको जोखिम तथा सन्त्रास बढेसँगै मुस्ताङका विद्यालयमा जारी वार्षिक परीक्षा प्रभावित भएको छ ।
गत वैशाख १० देखि वार्षिक परीक्षा सञ्चालन गर्दै आएको घरपझोङ ४ जोमसोमको धौलागिरी आवासीय माविका केही विद्यार्थी बिरामी भएका छन् ।
विद्यार्थी बिरामी पर्न थालेपछि चलिरहेको वार्षिक परीक्षा मंगलबारदेखि स्थगित भएको छ ।
विद्यालयका सहायक प्रधानाध्यापक अनिरुद्ध गौतमले सरकारद्वारा गठित सिसिएमसीले देशभरका शैक्षिक संस्था तथा वार्षिक परीक्षा तत्काल स्थगित गर्न निर्देशन गरेकाले यो निर्णय भएको बताए ।
बाँकी विषयमा यसअघिको अर्थवार्षिक परीक्षाको मूल्यांकनको आधारमा विद्यार्थीको मूल्यांकन गरिने गौतमले बताए ।
घरपझोङ गाउँपालिका र थासाङ गाउँपालिकाले पनि चाडै विद्यालय बन्द गर्ने उपाय खोजेका छन् ।
एक दिनै २ वटा विषयको परीक्षा गर्ने यहाँका स्कुलहरुको तयारी छ । स्थानीय तहका शिक्षा शाखाले वार्षिक परीक्षा सञ्चालनका लागि यस्तो निर्णय गरेका हुन् ।
मुस्ताङको थासाङमा बिहीबार र घरपझोङ गाउँपालिकामा शुक्रबारबाट वार्षिक परीक्षा भइरहेको छ । वारागुङ मुक्तिक्षेत्र गाउँपालिकाले भने विद्यार्थीको संख्या न्यून भएकाले नियमित वार्षिक परीक्षालाई निरन्तता दिने जनाएको छ ।
उपल्लो मुस्ताङको लोमान्थाङ र लोघेकर दामोदरकुण्ड गाउँपालिकामा वैशाख १५ गतेदेखि वार्षिक परीक्षा सञ्चालन गर्ने कार्यतालिका सार्वजनिक भएको थियो । यहाँ परीक्षा हुने कि स्थगित हुने भन्ने निर्णय भइसकेको छैन ।
यसअघि मुस्ताङका ५ वटै तहका विद्यालयले वैशाखमा वार्षिक परीक्षा सकेर जेठ १ गतेबाट नयाँ शैक्षिक सत्र सुरु गर्ने निर्णय गरेका थिए ।
कोरोनाको दोस्रो लहर फैलिने जोखिम बढेपछि मुस्ताङका ५१ सामुदायिक विद्यालयको पठनपाठन र परीक्षा प्रभावित भएको छ ।
पोखरा जोमसोम उडान रोकियो
मुस्ताङमा अवस्थित प्रसिद्ध धार्मिक स्थल मुक्तिनाथ मन्दिर गत शनिबारदेखि बन्द छ ।
पोखरा—जोमसोम हवाई सेवा सोमबारदेखि नै बन्द भएको जोमसोम नागरिक उड्यन कार्यालय मुस्ताङले जनाएको छ ।
नागरिक उड्यन कार्यालय मुस्ताङका अनुसार मुक्तिनाथ मन्दिर कोरोना त्रासका कारण बन्द हुँदा आन्तरिक तथा विदेशी पर्यटक मुस्ताङ नआउने भएपछि एअरलायन्स कम्पनीहरुले सेवा बन्द गरेका हुन् ।
यसअघि कोरोना माहामारीले १ वर्षसम्म बन्द भएको पोखरा जोमसोम हवाइ सेवा गत फागुन २१ गतेबाट सुरु भएको थियो ।
तपाईको प्रतिक्रिया