जनमोर्चाका संसदीय दलका नेता थापा र सभामुखबीच छलफल

समाधान संवाददाता २०७८ वैशाख १९ गते १४:३०

समाधान संवाददाता, पोखरा

गण्डकी प्रदेश सभाका सभामुख नेत्रनाथ अधिकारीले दलहरुसँग छलफल थालेका छन् ।

स्थगित रहेको प्रदेश सभाको बैठक डाक्न उनले दलहरुसँग छलफल थालेका हुन् ।

आइतबार सभामुख अधिकारीले राष्ट्रिय जनमोर्चाका संसदीय दलका नेता कृष्ण थापासँग भेटेका थिए । बिहान ११ बजे सांसद थापा र सभामुखबीच भेटवार्ता भएको थियो ।

भेटमा सभामुख अधिकारीले जनमोर्चाका ‘अज्ञात’ भनिएका सांसद खिमविक्रम शाहीको बारेमा जानकारी लिएका थिए ।

१५ वैशाखको बैठक जनमोर्चाकी सचेतक पियारी थापाले सांसद शाहीको अवस्था अज्ञात रहेको भन्दै सभामुखलाई निवेदन दिएपछि अनिश्चितकालागि स्थगित भएको थियो ।

सभामुख अधिकारीलाई संसदीय दलका नेता थापाले शाही भेटिएको औपचारिक जानकारी गराएका छन् । ‘मैले जानकारी गराएँ, संसद कसरी सुरु गर्ने भन्ने बारे उहाँले दलको राय लिनुभयो,’ सांसद थापाले भने ।

भेटमा सांसद थापाले सदनको गतिरोध रोक्न बैठक यथाशीघ्र छिटो डाक्न अनुरोध गरेका छन् । आफ्नो दलका कारण सदन अनिश्चितकालका लागि स्थगित भएपछि छिटो सुरु गर्न सुझाव दिएको थापाले बताए ।

‘दलको कारण धेरै समय स्थगित भएको छ, अब छिटो सुरु गर्नुस् भनेको छु,’ थापाले सुनाए ।

तपाईको प्रतिक्रिया