गण्डकी सरकारबारे जनमाेर्चाले अहिले निर्णय नगर्ने, केन्द्रीय राजनीति हेरेर निर्णय

समाधान संवाददाता २०७८ वैशाख २७ गते १४:५०

समाधान संवाददाता, पाेखरा ।

गण्डकी प्रदेशमा नयाँ सरकार गठन गर्ने साँचाे बाेकेर बसेकाे राष्ट्रिय जनमाेर्चा गण्डकीले अहिले कुनै निर्णय नगर्ने भएकाे छ ।

कांग्रेस–माओवादी केन्द्र–जसपा गठबन्धनले कांग्रेस संसदीय दलका नेता कृष्णचन्द्र नेपालीकाे नेतृत्वमा नयाँ सरकार गठन गर्न २८ जना प्रदेश सांसदकाे हस्ताक्षर गरेर जनमाेर्चालाई कुरी बसेका छन् ।

जनमाेर्चाले हिजै हस्ताक्षर गरेकाे भए हिजै नयाँ सरकार गठनकाे दावी गर्ने तयारी गरेका विपक्षी गठबन्धनलाई साे पार्टीकाे नेतृत्वले आज दिउसाेसम्म पर्खन भनेकाे थियाे ।

आज ११ बजे बस्ने भनिएकाे जनमाेर्चाकाे गण्डकी प्रदेश सभाकाे संसदीय दलकाे बैठक अहिलेसम्म बसेकाे छैन । पार्टी कमिटीका बैठक बसेपनि संसदीय दलकाे बैठक नबसेकाे जनमाेर्चाका गण्डकी प्रदेश अध्यक्ष शंकर बरालले समाधानलाई जानकारी दिए ।

प्रदेश अध्यक्ष बरालका अनुसार गण्डकी प्रदेशमा कसरी अघि बढ्ने भन्ने कुराकाे मार्ग निर्देशन केन्द्रकाे राजनीतिक घटनाक्रमले गर्ने बताए । अब काठमाण्डाैंकाे राजनीति कसरी अघि बढ्छ, त्यसैका आधारमा गण्डकीमा निर्णय लिने कुरा हुन्छ हाेला– उनले भने ।

काठमाण्डाैंमा संघीय सरकारका प्रधानमन्त्री केपी शर्मा ओलीले विश्वासकाे मत लिदैंछन् । संघीय संसदकाे घटनाक्रमपछि मात्र यहाँ कसरी अघि बढ्ने भन्ने निर्णय लिने जानकारी पनि बरालले दिएका छन् ।

तपाईको प्रतिक्रिया