समाधान संवाददाता, पोखरा

नेकपा एमालेका स्व. नेताद्वय मदन भण्डारी र जीवराज आश्रितको पोखरामा सम्झना गरिएको छ ।

नेताद्वयको २८ औँ स्मृति दिवसमा एमाले नेता/कार्यकर्ताले पोखरा १६ बाटुलेचौरस्थित मदन आश्रित स्मृति पार्कमा रहेको स्वर्गीय नेता भण्डारी र आश्रितको शालिकमा माल्यार्पण गरेर उनीहरुको सम्झना गरेका हुन् ।

कार्यक्रम एमाले कास्की जिल्ला कमिटीको आयोजनामा भएको हो । प्रतिनिधिसभा सदस्य खगराज अधिकारी, एमाले कास्की जिल्ला अध्यक्ष एवं प्रदेश सांसद कृष्ण थापा, मेयर मानबहादुर जिसी, उपमेयर मञ्जुदेवी गुरुङ लगायतले माल्यार्पण गरेका हुन् ।

जिल्ला अध्यक्ष एवं सांसद थापाको अध्यक्षतामा आयोजित कार्यक्रममा बोल्दै प्रमुख अतिथि सांसद अधिकारीले एमालेभित्र गुटफुट ल्याउने प्रवृत्ति हाबी भएको र मदन भण्डारीका अनुयायी गुटफुटतिर लाग्न नहुने बताए ।

प्रदेश सांसद एवं जिल्ला अध्यक्ष थापाले कम्युनिस्ट आन्दोलनमा मदन भण्डारीको योगदान महत्वपूर्ण रहेको र बन्दाबन्दीको बेला भए पनि योगदानको सम्झना गरिएको बताए ।

भीडभाड गर्ने अवस्था नरहेकाले स्वास्थ्य मापदण्ड अपनाएर सीमित व्यक्तिको उपस्थितिमा कम्युनिस्ट आन्दोलनमा अतुलनीय योगदान दिएका नेताको सम्झना गरिएको अध्यक्ष थापाले बताए ।

प्रशासनसँग अनुमति लिएर स्वास्थ्य मापदण्ड अपनाएर आयोजित कार्यक्रममा पोखरा १६ का वडाअध्यक्ष जीवन आचार्य र पोखरा १९ का अध्यक्ष शोभामोहन पौडेल पनि उपस्थित थिए । कार्यक्रम सञ्चालन जिल्ला समन्वय समिति कास्कीका अध्यक्ष बैनबहादुर क्षेत्रीले गरेका थिए ।

पोखरामा सहित सोमबार स्वर्गीय नेता भण्डारी र आश्रितको २८ औँ स्मृति दिवस देशका विभिन्न ठाउँमा मनाइएको छ । २०५० साल जेठ ३ गते चितवनको नारायणगढ–मुग्लिन सडकखण्डअन्तर्गत दासढुंगामा भएको जीप दुर्घटनामा एमालेका तत्कालीन महासचिव मदन भण्डारी र नेता जीवराज आश्रितको निधन भएको थियो ।