समाधान संवाददाता, पाेखरा ।

राष्ट्रिय जनमाेर्चाकाे साधाररण सदस्यबाट समेत निस्काशित गण्डकी प्रदेश सभाका सांसद कृष्ण थापाकाे सांसद पद भने कायमै छ ।

नेपाली कांग्रेसका संसदीय दलका नेता कृष्णचन्द्र नेपालीलाई मुख्यमन्त्री बनाउनका लागि हस्ताक्षर नगरेका थापालाई पार्टीले साधारण सदस्य समेत नरहने गरी १ बर्षका लागि निस्कासन गरिसकेकेा छ ।

जनमाेर्चाका महामन्त्री मनाेज भट्टले केन्द्रीय सदस्य समेत रहेका सांसद थापालाई पार्टी निर्देशन नमानेकै कारण निस्काशन गरेकाे बताउदै फेरि पनि पार्टी निर्णय नमानेमा सांसदबाट समेत हटाउने बताए ।

प्रदेश सभामा सबैभन्दा ठूलो दलको नेताको हैसियतमा फेरि मुख्यमन्त्री बनेका पृथ्वीसुब्बा गुरुङले विश्वासको मत लिने बेला विपक्षमा मतदान गर्न आफ्ना प्रदेश सांसदहरुलाई निर्देशन दिने निर्णय शनिबारको पार्टी बैठकले गरेको भट्टले समाधानसँग बताए । याे निर्णय पनि नमानेमा सांसदबाट हटाउन सक्ने उनले जानकारी दिए ।

३ सांसद रहेको जनमोर्चा गण्डकी प्रदेशमा सरकार निर्माणमा निर्णायक छ । ती सांसद एमाले वा कांग्रेससहितको गठबन्धन जुन पक्षमा हुन्छन् उसैको सरकार बन्न सक्छ । ६० सदस्यीय प्रदेश सभामा एमालेमा २८, कांग्रेसका १५, माओवादी केन्द्रका १२ (सभामुखसहित), जनमोर्चाका ३ र जनता समाजवादी पार्टीका २ सांसद छन् ।