अब गण्डकी अस्पतालमा कोरोना संक्रमितको मात्रै उपचार

समाधान संवाददाता २०७८ जेठ १० गते १६:१६

समाधान संवाददाता, पोखरा

पश्चिमाञ्चल क्षेत्रीय अस्पताल (गण्डकी अस्पताल)मा अब कोरोना संक्रमितको मात्रै उपचार हुने भएको छ । कोरोना संक्रमितको उपचार गर्न आवश्यक प्रक्रिया पुरा गर्न अस्पतालले मंगलबारदेखि ओपिडी सेवा बन्द गर्दैछ ।

अब १५ देखि २० दिनभित्र सबै तयारी सकिने र त्यसपछि संक्रमित राख्न सकिने अस्पतालका सूचना अधिकारी नारायण अचार्यले बताए । ‘अस्पतालमा अहिले भइरहेको बाहेक ३८० बेडमा पनि कोरोनाकै उपचार गर्ने तयारी छ । धेरै बिरामीलाई अक्सिजन चाहिने भएकाले त्यसको व्यवस्थापन गर्न समय लाग्छ,’ उनले भने ।

अहिले क्षेत्रीय अस्पतालमा ८० बेड कोरोना संक्रमितको उपचारका लागि छ ।

नेपाल सरकार सचिवस्तरको आइतबारको बैठकले क्षेत्रीय अस्पताललाई कोरोना संक्रमितको मात्रै उपचार गर्ने अस्पताल बनाउने निर्णय गरेको थियो ।

गत ५ वैशाखमा बसेको गण्डकी प्रदेश मन्त्रिपरिषद् बैठकले क्षेत्रीय अस्पताललाई कोरोना संक्रमितको मात्रै उपचार गराउने अस्पताल बनाउन केन्द्र सरकारलाई सिफारिस गर्ने निर्णय गरेको थियो ।

गम्भीर बिरामीको उपचारका लागि अस्पतालको इमर्जेन्सी सेवा भने यथावत रहने छ । मृगौलाका बिरामीका लागि डायलासिस पनि निरन्तर रहने सूचना अधिकारी आचार्यले बताए ।

तपाईको प्रतिक्रिया