वीरेन्द्रनगर, २० जेठ

कर्णाली प्रदेशमा २ जना मन्त्री पठाएर कांग्रेस प्रदेशबाट सत्तारोहणको सुरुआत गर्ने भएको छ । २०७४ सालमा भएको निर्वाचनपछि नेपाली कांग्रेस पहिलोपटक सत्तामा फर्कन लागेको हो ।

२०७४ यता अहिलेसम्म संघ र ७ वटा सबै प्रदेशमा कांग्रेस प्रतिपक्षीमा छ । पहिलोपटक प्रदेशमार्फत सत्तामा प्रवेश गर्न गरेको हो । कम्युनिस्ट गढ भनेर चिनिने र कांग्रेस सबैभन्दा कमजोर देखिएको प्रदेश कर्णाली प्रदेशबाट सरकारमा उसको पहिलो ‘इन्ट्री’ भएको छ ।

नेपाली कांग्रेसले दुईवटा मन्त्रालयको नेतृत्व गर्ने गरी कर्णाली प्रदेश सरकारमा सहभागी हुने निर्णय गरेको छ । कांग्रेसले कर्णाली प्रेदशमा सामाजिक विकास र जलस्रोत गरी दुई मन्त्रालयको नेतृत्व गर्नेछ । प्रदेश सांसदहरु यज्ञबहादुर बिसी र दिनबन्धु श्रेष्ठलाई मन्त्री बनाउने तयारी रहेको जानकार स्रोतहरुको भनाइ छ ।

मूख्यमन्त्री महेन्द्रबहादुर शाहीले वैशाखमा विश्वासको मत लिँदा कांग्रेसले उनको पक्षमा मतदान गरेको थियो । कांग्रेसले मन्त्री बन्नेहरुको नाम दिएपछि शुक्रबार मन्त्रीको सपथ हुने मुख्यमन्त्रीनिकट स्रोतले जनाएको छ ।

कांग्रेस सभापति शेरबहादुर देउवाले जेठ ७ गते माओवादी केन्द्रसहितको गठबन्धनको सहयोगमा आफ्नो पक्षमा संसदको बहुमत जुटाएर प्रधानमन्त्री पदका लागि दाबी प्रस्तुत गरेका थिए ।

तर राष्ट्रपति विद्यादेवी भण्डारीले बहालवाला प्रधानमन्त्री केपी शर्मा ओलीको समेत दाबी परेको र दुवैमा भरपर्दो आधार नदेखिएको भन्दै संसद नै विघटन गरेकी थिइन् । सो निर्णयविरुद्ध देउवासहितका १ सय ४६ सांसद अहिले सर्वोच्च अदालत पुगेका छन् ।