लिखित सहमति बिना सरकारमा नजाने सांसद लामाको चेतावनी

समाधान संवाददाता २०७८ जेठ २९ गते २०:२१

समाधान संवाददाता, पोखरा

जनता समाजवादी संसदीय दल गण्डकीकी सचेतक धनमाया लामा पोखरेलले सरकारमा नजाने चेतावनी दिएकी छन् ।

पूर्व सहमति अनुसार दलका २ जना सांसदले एकसाथ शपथ नखुवाए सरकारलाई साथ नदिने उनको चेतावनी छ । जनता समाजवादीका २ सांसदमध्ये हरिशरण आचार्यले आज शपथ लिने तयारी छ ।

कांग्रेस नेतृत्वको गठबन्धनमा जान आफूहरुले २ जना सांसद नै मन्त्री बन्ने सहमति गरेपनि अहिले आएर सहमति तोड्न खोजिएको उनको आरोप छ । ‘हामीले पहिलाबाट नै २ जना नै सरकारमा जाने सहमति गरेको हो, तर आज उहाँहरु हुन्न भन्नुभएको छ,’ लामाले भनिन् ।

लिखित सम्झौता नभएसम्म जनता समाजवादी सरकारमा नजाने उनको दाबी छ । प्रदेश कमिटीको बैठकले आज गरेको निर्णय पनि त्यही रहेको उनले बताइन् । ‘हाम्रो आजको जुम मिटिङको पनि निर्णय त्यही थियो, २ जना नै जानुपर्छ भन्ने, १ जनामात्रै गएपनि सरकारलाई साथ दिन सकिन्नँ,’ लामाले भनिन् ।

तपाईको प्रतिक्रिया