विप्लवका वैकल्पिक केन्द्रीय सदस्य बास्तोला पक्राउ

समाधान संवाददाता २०७८ असार २६ गते २१:२३

बमले उडाइदिने धम्की दिँदै रकम असुलमा सक्रिय रहेको अभियोगमा नेत्रविक्रम चन्द ‘विप्लव’ नेतृत्वको नेकपाका वैकल्पिक केन्द्रीय सदस्य प्रकाश बास्तोला पक्राउ परेका छन् ।

सरकारसँग वार्ता र सहमति गरी नेकपा खुला राजनीतिमा आएको हो । विभिन्न व्यक्ति र व्यवसायीलाई धम्क्याउँदै ठूलै रकम माग गरेको उजुरी परेपछि उनलाई नियन्त्रणमा लिइएको जिल्ला प्रहरी कार्यालय कास्कीका प्रवक्त डिएसपी सुभाष हमालले समाधानलाई बताए ।

कास्कीको रुपा गाउपालिका ३ टाकाम्जा घर भएका २६ वर्षीय बास्तोला शनिबार साँझ पोखरा रंगशाला गेट अगाडिबाट पक्राउ परेका हुन् । उनलाई जिल्ला प्रहरी कार्यालय कास्कीको हिरासतमा राखिएको छ ।

प्रहरी प्रवक्ता हमालका अनुसार उनी धम्क्याएर रकम असुलीका पटके अभियुक्त हुन् । अहिले पनि ४–५ जनाले प्रमाणसहित उजुरी दिएकाले पक्राउ गरेको हमालले बताए । उनी एक्लै छन् कि गिरोह नै सक्रिय छ भन्ने खोजिने उल्लेख गर्दै हमालले आइतबार म्याद थपेर अनुसन्धान गरिने जानकारी दिए ।

तपाईको प्रतिक्रिया