समाधान संवाददाता, पोखरा

नेपाली कांग्रेस संसदीय दलका नेता कृष्णचन्द्र नेपालीलाई मुख्यमन्त्री बनाउन निर्णायक भूमिका खेलेको राष्ट्रिय जनमोर्चाका सांसद खिमविक्रम शाहीलाई सत्ता गठबन्धनले पुरस्कृत गर्दै प्रदेश मामिला समिति सभापति बनाएको छ ।

शाही यसअघि प्रदेश सार्वजनिक लेखा समिति सदस्य थिए । असार ३० गतेको गण्डकी प्रदेश सभा बैठकले शाहीलाई प्रदेश सभाको प्रदेश मामिला समिति सदस्य बनाउने प्रस्ताव पारित गरेको थियो । समितिको आज मंगलबारको बैठकबाट शाही सभापति चयन भएका हुन् ।

यसअघि उक्त समितिको सभापति जनमोर्चाकै सांसद कृष्ण थापा थिए । तर जनमोर्चाले उनलाई सांसद पदबाट मुक्त हुने गरी जेठ अन्तिम साता कारबाही गरेको थियो । ३ सांसद भएको जनमोर्चाका शाही र पियारी थापा मात्रै भएका छन् । थापालाई २ जनाकै बैठकले संसदीय दल नेता यसअघि नै चयन गरेको छ ।

जनमाेर्चाले कांग्रेस नेतृत्व सरकारलाई साथ दिएको छ । तर ऊ मन्त्री लिएर सरकारमा सहभागी नहुने नीतिमा छ । तर गाडीसहितका सुविधा प्राप्त हुने संसदीय समितिमा जान भने पहिल्यैदेखि तयार थियो र गएको पनि थियो । यसअघि एमाले नेता पृथ्वीसुब्बा गुरुङ नेतृत्व सरकारलाई समर्थन गरेको जनमोर्चाको संसदीय दलका नेता कृष्ण थापा प्रदेश मामिला समिति सभापति भएका थिए ।

प्रदेश मामिला समितिमा १३ जना सदस्य छन् । तीमध्ये कांग्रेस, माओवादी र जनमोर्चाका बहुमत अर्थात ७ र प्रतिपक्ष दल एमालेका ६ सांसद छन् । बहुमतकै आधारमा पनि सत्ता गठबन्धनकै पक्षको उम्मेदवारले जित्ने देखिएपछि सभापति दाबा गरी मनोनयन दर्ता गरेका एमाले सांसद इन्द्रधारा विष्टले पछि उम्मेवारी फिर्ता लिएका थिए ।