एसके थकाली \ जोमसोम

बालिकालाई जबरजस्ती करणी गरेको आरोपमा मुस्ताङमा दुई युवा पक्राउ परेका छन् । घरपझोङ —२ मार्फाका १९ वर्षीय सौगात गोतामे र पुर्वी रुकुम पुथा उत्तरगंगा —१ घरभई घरपझोङ—५ ढुम्बा बस्ने बर्ष २१ का अमित पुनमगर करणीको आरोपमा पक्राउ परेका हुन् ।

मुस्ताङको थासाङ गाउँपालिकाको एक स्थानमा गत बिहिबार उनीहरुले १६ र १७ वर्षीया दुई बालिकालाई जबरजस्ती करणी गरेको जिल्ला प्रहरी कार्यालय मुस्ताङले जानकारी दिएको छ ।
जबरजस्ती करणीको आरोपी अमित पुनमगरलाई थासाङ—४ घाँसा र अर्को आरोपी सौगात गोतामेलाई घरपझोङ—२ मार्फाबाट पक्राउ गरेको प्रहरी निरीक्षक आशिष अधिकारीले बताए ।

घटनाको सूचनाका आधारमा प्रहरीले आरोपी दुई युवालाई पक्राउ गरी जिल्ला अदालत मुस्ताङमा पेस गरेको छ । प्रहरीले अदालतबाट १५ दिने म्याद राखी आवश्यक अनुसन्धान प्रक्रिया अगाडी बढाएको जनाएको छ ।