समाधान संवाददाता
पोखरा- पोखरा महानगरपालिकाका प्रमुख मानबहादुर जिसी १ महिनादेखि अस्वस्थ छन् । १ साउनमा मष्तिस्कघात भएपछि मेयर जिसी अहिले काठमाडौंमा छन् । जटिल शल्यक्रिया पछि १९ दिन अस्पताल बसेर उनी डिस्चार्ज भएका थिए ।

यद्यपी उनी सक्रिय जीवनमा फर्कन भने समय लाग्ने उनको उपचारमा खटिएका चिकित्सक बताउँछन् । मेयर जिसी अहिले बोल्न सक्छन् । हिँडडुल गर्न भने समस्या छ । उनको बायाँ हात र खुट्टाको फिजियोथेरापी भइरहेको र स्वास्थ्य सुधारोन्मुख रहेको उनको सचिवालयले बताएको छ ।

मेयर जिसी अस्वस्थ भएर काममा आउन नसक्दा महानगरको आर्थिक गतिविधि र विकास निर्माण भने ठप्पप्राय छ । नयाँ आर्थिक बर्षका लागि बजेट खर्च गर्न अख्तियारी दिन नपाउँदै मेयर जिसी अस्वस्थ भएकाले आर्थिक गतिविधि र विकास निर्माणका काम ठप्प भएका हुन् ।
नयाँ बजेट पारित भएको १ हप्ताभित्र महानगर प्रमुखले बजेट खर्च गर्ने अख्तियारी प्रमुख प्रशासकीय अधिकृतलाई दिनुपर्ने कानुनी व्यवस्था छ । त्यसको १५ दिनभित्र प्रमुख प्रशासकीय अधिकृतले सम्बन्धित महाशाखा प्रमुख र वडा सचिवहरुलाई अख्तियारी दिनुपर्छ । महानगरका प्रमुख प्रशासकीय अधिकृत महेश बराल अहिले महानगरमा कठिन अवस्था आएपछि जेनतेन व्यवस्थापन गर्नुपरेको बताउँछन् । ‘कठिन अवस्था हो, जेनतेन धानेका छौं, आर्थिक वर्षको पहिलो दिननै मेयरज्यू बिरामी पर्नुभयो,’ उनले भने ।

अहिले महानगरमा राजश्व संकलन बाहेकका अन्य आर्थिक गतिविधि ठप्प छन् । कर्मचारीले तलब भत्ता पाएका छैनन् भने महानगरले दिनुपर्ने भुक्तानी रोकिएका छन् । फोहोर मैला व्यवस्थापनको सम्झौता सकिएको र नवीकरण हुन नसक्दा फोहोर नउठ्ने अवस्था सिर्जना भएको छ ।

महानगर उपप्रमुख मञ्जुदेवी गुरुङ भने मेयर जिसीको अन्तिम फलोअप भइसकेको र अब अख्तियारी दिने बताउँछिन् । मेयर जिसी सामान्य लेखपढ गर्न सक्ने भएपछि महानगरबाट अख्तियारी दिइने र कामकारबाही अघि बढाइने उनले बताइन् । ‘उहाँको अन्तिम फलो अप सकियो । अब उहाँले अख्तियारी दिनुहुन्छ । अहिले बिस्तारै कामहरु भइरहेकै छन्,’ उपप्रमुख गुरुङले भनिन् ।