जनवादी गायक जेबी टुहुरे रहेनन्

समाधान संवाददाता २०७८ भदौ १० गते १६:४५

जनवादी गायक जेबी टुहुरे (जुठबहादुर खड्की) को निधन भएको छ ।

उपचारका क्रममा टुहुरेको ७८ वर्षको उमेरमा निधन भएको हो । १ भदौमा कलंकीस्थित निवासमा भान्सामा लडेपछि टुहुरेलाई उपचारका लागि बयोधा अस्पताल भर्ना गरिएको थियो । उनको भेन्टिलेटरमा राखेर उपचार भइरहेको थियो ।

टुहुरेलाई मुटु, फोक्सो, मधुमेह र उच्च रक्तचापको समेत समस्या भएपछि शल्यक्रिया गर्न समेत मिलेको थिएन । ‘आमा दिदी बहिनी हो, कति बस्छौं दासी भई सुखको सधैँ प्यासी बनेर।।’ लगायत डेढ सयभन्दा बढी गीत गाएका टुहुरे आफ्नो जीवन संघर्षबारे पुस्तक प्रकाशनको तयारीमा थिए ।

२०१६-१७ सालदेखि रेडियो नेपालमा गीत गाउन थालेका उनी टुहुरे २०२४ सालदेखि कम्युनिस्ट आन्दोलनमा होमिएका थिए । त्यसपछि नै उनले जनगायकको परिचय बनाएका हुन् । उनले जीवनका ५५ बसन्त जनताकै गीत गाएर बिताए । माले, एमाले हुँदै दोस्रो संविधानसभामा उनी माओवादीमा प्रवेश गरी सभासद् बनेका थिए ।

तपाईको प्रतिक्रिया