समाधान संवाददाता

पोखरा

पाेखरा–संस्कृतिकर्मी लोकबहादुर गुरुङको सातांै स्मृति दिवसको अवसरमा शनिबार पत्रकार तथा लोकगायिका शान्ति गुरुङलाई सम्मान गरिएको छ ।

लोकबहादुर स्मृति प्रतिष्ठानले आयोजना गरेको कार्यक्रमारेडियो नेपाल प्रादेशिक प्रशारण केन्द्रका उप्रमुख एवं वरिष्ठ सम्पादक, तमु सञ्चारकर्मी संघ कास्कीकी अध्यक्षगुरुङलाई ३५ हजार नगदसहित दोसल्ला ओढाएर सम्मानपत्र गरियो । गण्डकी प्रदेशसभा सदस्य मीना गुरुङ, प्रतिष्ठानका अध्यक्ष वेदबहादुर गुरुङ (श्याम) र लोकबहादुर गुरुङकी पत्नी सीता गुरुङले पत्रकार गुरुङलाई सम्मान गरे ।

प्रदेश सभा सदस्य गुरुङले संस्कृतिकर्मी गुरुङ सबैका लागि प्रेरणा र मार्गदर्शक व्यक्ति भएको बताइन् । उनले लोकबहादुरले आफूलाई राजनीतिक क्षेत्रमा लाग्न प्रोत्साहन गरेको उल्लेख गरिन् ।सबैको प्रिय व्यक्तित्वको गुमाउँदा ठूलो पीडा भएको चर्चा गर्दै उनले प्रतिष्ठानले सदाको लागि स्मरण हुने काम गरेको बताइन् ।

प्रतिष्ठानका अध्यक्ष गुरुङले लोकबहादुरको शिक्षा र सांस्कृतिक क्षेत्रमा योगदान रहेको बताए । गुरुङ फिल्मका नायकसमेत रहेका अध्यक्ष गुरुङले लोकबहादुरसँगको सहकार्यमा धेरै सिक्ने अवसर पाएको उल्लेख गरे ।

पत्रकार शान्ति गुरुङले कलाकारिता र पत्रकारिताका लागि सधै प्रोत्साहन गर्ने आदर्श व्यक्तित्वको स्मृतिमा सम्मानित हुन पाउँदा गौरव महसुस गरेको बताइन् । उनले लोकबहादुर कला संस्कृति र पत्रकारिता लगायत विभिन्न क्षेत्रमा क्रियाशील युवाको पथ प्रदर्शक रहेको उल्लेख गरिन् । कार्यक्रममा गुरुङ साहित्यिक मञ्चकी अध्यक्ष गौरी गुरुङ, प्रतिष्ठानकी सचिव रोशनी गुरुङ लगायतले बोलेका थिए ।